Johannes Diuina miseracione Spalatensis Archiepiscopus, tocius Dalmacie, Croatie, Sclauonieque Primas, venerabili fratri domino N. per eandem Episcopo Scardonensi, salutem in Domino. Testante Sacro Concilio anno preterito in Spalato celebrato, ordinasse ac firmiter precepisse recolimus, quod nullus Suffraganeorum nostrorum in preiudicium alterius, clericos alterius Diocesis ad sacros ordines promouere, aut alia ecclesiastica et episcopalia sacramenta ministrare presumat, sub pena quingentarum librarum, sed sue Diocesis finibus sit contentus. Quod preceptum et tam salubre statutum venerabilis frater noster G. Dei gracia Traguriensis Episcopus in festo Beati Dompnij, presentibus nostris Suffraganeis et vniuerso Clero, vos infregisse grauiter nobis est conquestus; dicens, vos Sibenicenses Clericos ad sacros ordines promouisse, ac cis crisma contulisse, nec non baptisma paruulorum, ac alia sacramenta ecclesiastica et episcopalia celebrasse, in sui preiudicium et grauamen; cum dicti Clerici Sibeniceuses et totum Sibenicum subiecti sint de iure Episcopo et Episcopatui Traguriensi, excusantes uos omnia supradicta nostro mandato et auctoritate fecisse. Hanc totam suam querimoniam nobis impingendo, et contra nos conquerendo, plurimum nobis, quin pocius supra modum debitum, extitit infestus et molestus, tamquam grauiter sauciatus et afflictus. Et si bene recolitis, cum nuper in societate Pauli Bani ad nos accessistis, super eodem facto non solum a Traguriensibus, sed etiam a Spalatensibus, grauissimas lamentaciones et terribiles conquestiones in presencia domini Potestatis Spalatensis, et omnium nobilium Spalatensium, non absque magno nostri cordis dolore, et multi certaminis agone, opposita etiam contra nos rigida, dura, aspera et molesta appellacione, audiuimus. Super quibus omnibus grauiter afflicti et perturbati, ad instanciam et preces multas omnium Suffraganeorum nostrorum, qui presentes in festo Sancti Dompnii exstiterunt, taliter vestre fraternitati scribimus, et per hoc presens scriptum nostrum firmiter et districte precipimus et precipiendo mandamus: Quatenus in antea, sicut graciam Beati Dompnii et nostram caram habetis, et dicti Concilij penam uultis effugere, supradicta nullatenus attemptetis et in predictis nullatenus excedatis. Alioquin indignacionem Beati Dompnii et nostram, ac supradicti Concilij penam, si contra feceritis, procul dubio incurretis. Data Spalati in palacio Archiepiscopali die Martis XII. Madij infra octauas Beati Dompnij indictione sexta.

(Az eredeti után Kukuljevics Iván, Jura Regni Croaciae, Dalmatiae et Slavoniae I. köt. Zágráb, 1862. 95. l.)