Nos Comes Juan, filius Irozlay memorie commendantes notum facimus quibus expedit universis, quod nos intuitu Divine pietatis ducti ad devocionem, pro remissione peccatorum nostrorum, propiciante Deo hanc ordinacionem seu collacionem duximus faciendam: quod Monachys de Ordine fratrum Cisterciensium, de Abbacia Sancti Jacobi, de insula Zawa, iuxta Zagrabiam existentibus, dedimus, contulimus et tradidimus Ecclesiam nostram in honore Sancte Elene consecratam de Zamobor, et terram circa eandem existentem ad usum duorum aratrorum sufficientem, unum molendinum situm in fluuio Zamobor, unum fundum curie in villa Zamobor, pro sessione, et tres vineas in loco prenotato. Preterea in Brezoicha capellam nostram et terram sufficientem ad duo aratra, in fine terre nostre de Brezoicha existentem, ac unam vineam (in) Chucherie sitam, iure perpetuo pacifice et quiete possidendos. Hoc adiecto, quod in posterum nostri heredes heredumque successores, et similiter proximi nostri et eorum successores presentem collacionem nostram non possint aliqualiter retractare. Insuper nostre voluntatis et intencionis est, si creator omnem statum Regni Hungarie in melius reformaverit, et nobis dederit vitam longiorem, ut in loco capelle nostre de Brezoicha, Monasterium propriis laboribus nostris condamus et expensis ipsis Monachis fideliter precantibus ita, quod perfecto opere Monasterii inibi esse debeat per se locus Abbacie, ordinatis prius sufficientibus proventibus ad victum et vestitnm habitatoribus in eodem ac aliis necessariis uniuersis. Ut igitur huius collacionis et donacionis robur perpetue firmitatis obtineat presentes contulimus sigilli nostri munimine roboratas. Datum Zagrabie sabbato proximo ante quindenas Pasce Domini anno eiusdem MCCLXX. septimo.

(Tkalcsics, Monum. hist. Episc. Zagrab. I. köt. 187. l.)