Nos Andreas Dei gracia Rex Hungarie damus pro memoria, quod Comes Erdeu filius Sebrech ab vna parte, item Magister Dyonisius filius Arnach ex altera comparentes personaliter coram nobis proposuerunt; quod in causa, quam idem Comes Erdeu in octauis Beati Johannis Baptiste super facto requisicionis possessionum Ketpechen vocatarum habebat coram nobis contra Magistrum Dyonisium nominatum, per arbitrium Dominici Magistri Thauarnicorum nostrorum, Ladizlay Bani, Magistri Kokos, fratrum dicti Magistri Dominici; item Johannis filij Chaak Magistri Agasonum nostrorum; Magistri Demetrij Comitis de Zolum; et aliorum Baronum seu nobilium, in talem formam pacis seu concordie deuenissent vnionem: quod idem Comes Erdeu totalem requisicionem suam super facto earundem possessionum Kethpechen relinquit et resignauit contra eundem Magistrum Dyonisium, dando et permittendo easdem possessiones Kethpechen cum suis vtilitatibus et pertinencijs vniuersis, in quantum ipsum contigit, eidem Magistro Dyonisio et suis heredibus perpetuo possidendas, tenendas et habendas; ita tamen, quod idem Magister Dyonisius in redempcionem earundem possessionum Kethpechen assumpsit dare et soluere ducentas et viginti quinque marcas puri et fini argenti coram Capitulo Waciensi in terminis infrascriptis Comiti Erdeu supradicto; videlicet in quindenis Sancti Michaelis nunc venturis soluet sexaginta marcas; item in quindenis Epiphanie Domini soluet quadraginta marcas; item in ectauis Penthecostes soluet quadraginta marcas; item in quindenis Sancti Michaelis altesius videlicet festiuitatis soluet quadraginta marcas; item in quindenis Epiphanie Domini similiter alterius festiuitatis, vltimo scilicet termino totalis debiti, soluere tenetur quadraginta quinque marcas. Tali pena seu obligacione interposita, quod si idem Magister Dyonisius prius debitum sexaginta marcarum non persoluerit, incurret judicium Regale; si secundum obmitteret in soluendo, intret penam dupli; item si tercium debitum dare non curaret, similiter pene dupli subiacebit; item si in quarto termino negligens fieret in soluendo, pena dupli agrauatur; item si quintum et ultimum debitum non persoluerit plenarie, amittet idem Magister Dyonisius omnem totalem pecuniam suam in prioribus quatuor terminis modo prehabito persolutam. Preterea prefatus Comes Erdeu spontanea voluntate omnia priuilegia, et omnes litteras seu instrumenta, quecunque seu qualescunque haberet in hoc facto, statuere assumpsit in manus Magistri Nicolay filij Simonis Castellani nostri in Zekchu, quem partes ad hoc communiter elegerunt, persoluto tamen priori debito prefato per eundem Magistrum Dyonisium Comiti Erdeu supradicto; que videlicet omnia priuilegia, instrumenta seu litteras, postquam Magister Dyonisius plenarie et fiualiter iuxta suam premissam obligacionem prefatum totale debitum persoluerit Comiti Erdeu iam dicto, prefatus Magister Nicolaus filius Simonis dabit et assignabit, sicuti partes ordinarunt inter se, in manus Magistri Dyonisij memorati. Ceterum si predictus Comes Erdeu aliquas litteras seu instrumenta pro vtilitate dictarum possessionum Kethpeken habita pro se reseruaret, et Magistro Nicolao, aut postea Magistro Dyonisio non assignaret, quandocunque et vbicunque in litem producta fierent, pro cassis et irritis haberentur. Datum Bude octauo dye Sancti Johannis Baptiste anno Domini M°CC° nonagesimo septimo.

(A váczi káptalannak 1300-ki végrehajtási bizonyitványából, mint alább 266. sz. a.)