Uniuersis presentes litteras inspecturis Capitulum Ecclesie Strigoniensis salutem in Domino sempiternam. Ad vniuersorum noticiam tenore presencium volumus peruenire, significantes vniuersis presencium noticiam habituris, quod cum inter venerabilem patrem dominum nostrum dominum Lodomerium miseracione Diuina Archiepiscopum Strigoniensem nomine Magistri Thome Prepositi Sancti Thome Martiris de Promontorio Strigoniensi, scolaris Paduani, et Capituli loci eiusdem ex una parte, et Conuentum religiosarum personarum sororum Monasterij Sancte Marie de Insula iuxta Budam ex altera, super medietate tributi fori de Veteri Pest, quam ex collacione felicis recordacionis quondam Emerici Regis Hungarie competere sibi dicebat, predicte Ecclesie Sancti Thome, cuius Ecclesie ad ipsius domini nostri Archiepiscopi sollicitudinem pertinentis procuracionem ipse gerit quoad presens, primum coram Rege Ladizlao Vngarie, et nunc coram Andrea Dei gracia Regini Hungarie Rege illustri, mota fuisset materia questionis, et ipsa questio fuisset aliquamdiu uentilata, et postmodum per eundem dominum nostrum Archiepiscopum, et fratres Vgrinum filium Parasth de genere Chak, Gregorium Lectorem, Paulum et Briccium de Ordine Eratrum Predicatorum, ipsarum religiosarum sororum procuratores legaliter institutos, et de ratihabicione earundem sanctimonialium mandato sufficienti munitos, in personam eiusdem domini nostri Andree Regis, sub apposicione certe pene pecuniarie, quam pars non acceptans soluere deberet parti arbitrium acceptanti, ex utraque parte compromissum fuisset; tandem utriusque partis instrumentis coram deputatis a domino nostro Rege Prelatis et Baronibus, iusticie zelatoribus, hinc inde exhibitis plene perlectis, diligenter examinatis et plenius intellectis; ante euentum arbitrij siue laudi promulgandi per ipsum dominum nostrum Regem in hanc pacifice composicionis seriem pari concordia et communi consensu deuenerunt idem venerabilis pater dominus noster Archiepiscopus, et ipsi fratres superius nominati tocius Conuentus predictarum religiosarum sororum procuratores, sindici sev deffensores: Quod nomine et vice nominatorum Prepositi et Capituli Saneti Thome ipsam dimidiam partem tributi fori de Veteri Pest prefatis sororibus cum iure proprietatis et perpetui dominij memoratus dominus noster Archiepiscopus reliquit possidendam perpetualiter et habendam, assignatis in manus prefatorum fratrum procuratorum sepedicti Conuentus omnibus instrumentis, que super iure percipiendi partem dimidiam eiusdem tributi habebat Ecclesia Sancti Thome, omnibus alijs instrumantis, quocunque ingenio siue causa, nunc non apparentibus, omnibus omnino viribus carituris. In cuius tributi permutacionem siue concambium sepefati fratres ipsius Conuentus, expresso mediante consensu, contulerunt, tradiderunt, assignauerunt et dederunt quandam villam Ysa uocatam, sitam iuxta Danubium in Comitatu de Comarun prenotate Ecclesie Sancti Thome cum omnibus vtilitatibus et pertinencijs suis, videlicet piscaturis, insulis, siluis, fenetis terris arabilibus cultis sev incultis, et vniuersis alijs communitatibus (így) quocunque nomine censeantur, sub eisdem metis et terminis, quibus honorabilis et religiosus ipsarum dominarum Conuentus prefatam villam Ysa titulo donacionis sev collacionis felicis recordacionis quondam Regis Hungarie Bele quarti possederat ad hec tempora, pure, quiete, plene et pacifice pleno iure, assignato dicte Ecclesie Sancti Thome prefati Bele Regis priuilegio, collacionem sev donacionem eiusdem ville Ysa plenius et expressius continente. In cuius rey memoriam et perpetuam firmitatem presentes litteras, ad peticionem parcium predictarum, et eiusdem domini nostri Andree de speciali mandato, sigilli nostri appensione dedimus communitas. Datum per manus discreti viri Magistri Cypriani Ecclesie nostre Lectoris anno Domini M°CC° nonagesimo primo, tercio kalendas Junij.
A B C
(Eredetie bőrhártyán kék-zöld selyemzsinóron függő pecsét alatt, a budai kir. kamarai levéltárban.)