Ladizlaus Dei gracia Hungarie, Dalmacie, Croacie, Rame, Seruie, Gallicie, Lodomerie, Cumanie Bulgarieque Rex omnibus Christi fidelibus presentem paginam inspecturis salutem in omnium saluatore. Licet Regalis pietas manum munificam porrigere debeat vniuersis; illos tamen principaliori debet prosequi munere et fauore, quorum experta probitas laudata est in prosperis et in aduersis; ut alij eorum exemplis inuitati ad fidelitatis opera forcius accendantur. Proinde ad vniuersorum tam presencium quam posterorum noticiam harum serie uolumus peruenire, quod attendentes fidelitates et meritoria obsequia seu multiplices famulatus Magistri Ogwz fidelis iuuenis nostri, que idem domino Stephano illustri Regi Hungarie patri nostro karissimo felicissime recordacionis in diuersis expedicionibus, nobisque per consequens exhibuit et impendit; Nos qui ex officio suscepti regiminis metiri debemus merita singulorum, ut quos inconwlse fidelitatis stabilitas et indefessus deuocionis feruor insignit titulis meritorum, eos attollamus fauoribus Regijs, et dignis premiorum remuneracionibus, in recompensacionem seruiciorum eiusdem quandam terram Castri nostri Zaladiensis Kerechen uocatam ipsi Magistro Ogwz et suis heredibus heredumque suorum successoribus dedimus, donauimus et contulimus iure perpetuo possidendam sine iuris preiudiciorum (igy) aliorum, et eundem in corporalem possessionem dicte terre per Egidium de Royk hominem nostrum sub testimonio Conuentus Zaladiensis nullo contradictore existente fecimus introduci, prout id in litteris eiusdem Conuentus uidimus contineri. Mete eciam dicte terre, sicut in litteris iam dici Conuentus continetur, hoc ordine distinguntur: Prime due mete incipiunt a parte aquilonis, et ibi sunt due mete posite in ylicibus, que quidem mete separant de villa Ong; deinde uadit uersus meridiem, et ibi sunt due mete in terris; deinde uadit versus occidentem ad quandam uiam, et sunt due mete in terris, quarum vna est ab una parte uie, alia uero ab altera; deinde uadit uersus meridiem in eadem uia, et ibi sunt due mete itt terris; deinde protenditur uersus orientem usque ad longitudinem unius yugeris ad duas metas terreas; deinde progreditur uersus meridiem ad magnam siluam, et ibi sunt due mete, una in silua in ligno pomi, alia extra siluam in terra; deinde uadit iterum uersus orientem ad quandam arborem pomi; deinde uadit in uia in medio magne silue, et peruenit ad duas metas ylicum, que quidem mete separant de villa Bagata; deinde uadit uersus occidentem in eadem in silua ad quandam magnam arborem ylicis, que quidem arbor separat similiter de uilla Bagata, et de uilla Guelse; deinde protenditur uersus aquilonem, et peruenit ad duas metas terreas; deinde uadit uersus occidentem, et ibi sunt due mete posite in terris, que quidem mete separant de uilla Royk. Ut igitur huius rei series robur obtineat perpetue firmitatis, et ne processu temporum per quempiam possit in irritum reuocari, aut aliquatenus debeat retractarj, presentes concessimus litteras duplicis sigilli nostri munimine roboratas. Datum per manus Magistri Benedicti Orodiensis Ecclesie Prepositi, aule nostre Vice-Cancellarij dilecti et fidelis nostri anno Domini millesimo CCşLXXş tercio, decimo kalendas Octobris, Regni autem nostri anno primo. Venerabilibus patribus Stephano Colocensi et Johanne Spalatensi Archiepiscopis; Lamperto Agriensi, Job Quinqueecclesiensi, Bryccio Chanadiensi, Phylippo Waciensi, Paulo Wesprimiensi aule nostre Cancellario, Lodomerio Waradiensi, Dyonisio Jauriensi, Thymotheo Zagrabiensi, et Petro Transsiluano Episcopis Ecclesias Dei feliciter gubernantibus. Rolando Palatino Judice Cumanorum, Herrico Bano tocius Sclauonie, Nicolao Woyuoda Transsiluano Comite de Zounuk, Egidio Bano de Bozna et de Machov, Joachino Magistro Tauarnicorum nostrorum, Paulo Bano de Zeuryno, Reynoldo Magistro Dapiferorum nostrorum Comite Zulgageuriensi, Vgryno Magistro Agasonum nostrorum Comite Syrmiensi, Laurencio Magistro Pincernarum Comite de Keue et de Karasso, Johanne Comite Supruniensi, Deudalo Comite Zaladiensi, Gregorio Comite Castri Ferrei, Moys Comite Symigiensi, Michaele Comite Nitriensi. et Salomone Comite Alibensi, ac alijs quam pluribus Comitatus Regni nostri tenentibus et honores.
(Eredetie bőrhártyán, a vörös selyemzsinóron függött pecsét elveszett a budai kir. kamarai levéltárban.)