Frater Johannes Diuina prouidentia Archiepiscopus Spalatensis vniuersis Christi fidelibus, presentes litteras inspecturis salutem in eo, qui est vera salus. Cum naturalis industria feram pro suis fetibus reddit sollicitam; multo magis Prelatus, qui previa ratione, et Noui, et Veteris Testamenti, ac Canonum sanctione premunitur, suis in Christo filijs debet providere, et ipsos ab errore ad viam salutis reuocare. Hinc est, quod nos ad instantiam et petitionem Venerabilis fratris nostri Columbani Traguriensis Episcopi, et ex officio nostro, Sibenicum accedentes, quia clamor et fama de excessibus clericorum ibidem residentium ad aures nostras peruenerat, diligenter coram Ecclesie senioribus, videlicet Venerabilibus fratribus Episcopo Traguriensi eiusdem loci Diocesano, et Episcopo Pharensi, necnon fratre Bartholomeo quondam Episcopo Scardonensi, et alijs, fratribus... Dei gracia Abbate Sancti Stephani de Spalato, et Predicatoribus et Minoribus, ac alijs; quia clamor innuebat et diffamatio manifestabat, veritatem diligenter fecimus perscrutari; et quia rei poscebat qualitas, canonica distinctione culpas misericorditer puniuimus delinquentium. In primis Archipresbiter eiusdem loci pro eo, quod longo tempore tenuit concubinam; et quia non euitauit excommunicatos per dominum Episcopum suum; et quia sustinuit clericos in sacris ordinibus constitutos contrahere matrimonium; et quia contulit quamdam Ecclesiam non requisito Episcopo suo cum Comite cuidam monacho vago; et quia antiquam et laudabilem consuetudinem de nuptijs non seruauit; et quia illos, qui incidunt in canonem, pro absolutione ad Episcopum ire non compulit; sicut retulerunt nobis iurati quamplures testes idonei coram tribus Episcopis et coram Fratribus Predicatoribus et Minoribus; ieiunabit per tres annos omnes sextas ferias in pane et aqua, et suspendimus ipsum ab omnibus beneficijs suis per annum, ab officio et suspendimus eundem vsque ad Pascha inclusiue; et precipimus sibi, quod sit obediens domino Episcopo Traguriensi. Ad hec Abbas Sancti Nicolai et Abbas Sancte Marie de Insula, quia carnes comederunt contra regulam Sancti Benedicti, et quia sine monachis steterunt; volumus, quod ieiunent decem sextas ferias in pane et aqua, et legant X missas pro peccatis; et precipimus eis, quod corrigant se de istis. Preterea sacerdos Tolco, sacerdos Johannes, sacerdos Michael pro eo, quod in sacerdotio duxerunt vxores, et genuerunt pueros, ieiunabunt sextas ferias in pane et aqua omnibus diebus vite sue; et suspendimus ipsos ab officio et beneficio per tres annos; et precipimus eisdem in uirtute obedientie, et sub pena excommunicationis districte, quod ab hoc die dimittant suas uxores, et quod deinceps non accedant ad eas; et si contrarium fecerint, perpetuo sint priuati ab officio et beneficio. Item eandem penam per omnia iniungimus Michaeli diacono, Bogdano subdiacono, Dobros subdiacono, qui in Sacris Ordinibus constituti vxores duxerunt, et pueros genuerunt; hoc superadentes, videlicet Dobros subdiaconus, qui se absentauit a nostra visitatione sine nostre licentia, precipimus eidem sub pena excommunicationis et priuationis officij et beneficij sui districte, quod ante carnis priuium compareat coram nobis. Insuper Primus et Straco diaconus, quia ante Sacros Ordines duxerunt vxores, ipsos cum suis vxoribus stare permittimus, quia legitimum matrimonium iudicamus, sed eosdem officijs et beneficijs perpetuo spoliamus. Et quia solita memorie esse consueuit obliuio, ad correctionem presentium, et terrorem futurorum, sententiam nostram sigilli nostri munimine roboramus. Actum in Sibenico anno Domini M.CC.LX.VII. in presentia Venerabilium virorum domini Columbani dei gracia Episcopi Traguriensis, et domini Dobronia Episcopi Farensis, et G. Abbatis Sancti Stephani, et aliorum plurimorum religiosorum de Ordine Predicatorum, Minorum, nec non et Canonicorum Spalatensium et Traguriensium.
(Lucius, Memorie storiche de Trau 80. l. Az okmánynak töredékét közölte Fejér Cod. Dipl. VII. köt. 4. r. 134. l.)