Capitulum Ecclesie Beati Martini de Scepus omnibus Christi fidelibus presentibus pariter et futuris, quibus presentes ostendentur, salutem in omnium Saluatore. Ne rerum gestarum memoria simul cum tempore labatur seu euanescat, peritorum ea industria virorum litterarum patrocinio solidare, nec non perpetuare adinuenit. Proinde ad vniuersorum noticiam harum serie volumus peruenire, quod discretis viris Jasch de Helterwagora ab vna, ac Goblino filio Nicolai de Lapide ab altera parte, coram nobis personaliter constitutis, idem Jasch oraculo viue vocis est confessus, quod sculteciam suam in Noua Ruzumbach habitam, quam mediantibus nostris litteris dinoscitur comparasse, cum dimidia parte molendini, constituti in fluuio de eadem villa, braxatoria, ac duobus liberis laneis terrarum, et cum sexta parte census in exaccionibus prouenientis, cum causis vsque fertonem judicandis cum earum birsagijs ex integro percipiendis, ac causis supra fertonem judicandis more solito per scultetos et obseruato, cum tercia parte judicij earundem causarum percipienda, ac alijs et singulis vtilitatibus et pertinencijs ad eandem sculteciam spectantibus, vendidisset et vendidit prefato Goblino filio Nicolai pro viginti ses marcis grossorum denariorum plene habitis ab eodem et acceptis, sibi et suis successoribus in filios filiorum et eorum heredes jure perpetuo et irreuocabiliter pacifice possidendam, tenendam pariter et habendam; tali condicione mediante, quod supradictus Jasch ab omnibus impeticionibus, et maxime a fratribus et proximis suis vniuersis, racione dicte scultecie ipsum Goblinum et suos successores proprijs laboribus et expensis teneatur defendere et expedire; et nichilominus litteras nostras priuilegiales super eadem scultecia olim confectas, virtute quarum eandem habuit et possedit, tradidit in manus Gablini iam dicti Jasch predictus. Insuper Petrus frater eiusdem Goblini, vicinus comparens coram nobis personaliter, alteram medietatem molendini supradicti, comparatam a Hannus dicto Zolchener sculteto de Ruzumbach, cum omnibus suis vtilitatibus et pertinencijs ac juribus vendidit coram nobis dicto Goblino fratri suo pro decem marcis grossorum perpetuo jure et irreuocabiliter in filios filiorum ab eodem plene habitis et complete marcis supradictis, nihil juris nihilque dominij sibi in eodem molendino reseruans, in euum semper et in eternitatem perpetuam. Ad peticionem parcium supradictarum presens nostrum concessimus priuilegium pendentis sigilli nostri munimine roboratum. Datum in fasto Sancte Elisabeth Regine anno Domini millesimo ducentesimo quadragesimo tercio.

(III. János lengyel király által megerősítve, s az ú. n. „Liber Relationum et Oblatarum Castrensium Cracoviensium” czímű nyilvános könyvbe 1692. bejegyezve, a krakói országos törvényszék levéltárában.)