In Christi nomine Amen. Bench Clericus de Sala, Ibrahim, Nicolaus, Mochcus, Benche, Jacobus, et frater Egidius, procuratores jobagionum et populorum pro se, et jobagionibus et populis ex una parte, et dominus Vrias Abbas Sancti Martini de Sacro Monte Pannonie cum Henrico Priore, Thoma Custode, Lazaro Cameravio, Mathia magistro pistorum, Vitale Priore de Sala, Primo clavigero et Bernardo Monachis et procuratoribus Conventus ex altera, compromiserunt in fratrem Enoch Ordinis Predicatorum et Magistrum Cognoscentem Legum Doctorem Canonicum Strigoniensem, tamquam in arbitros vel arbitratores, et amicabiles compositores, promittentes partes sub pena infrascripta, ratum se habituras omnino quicquid dixerint, arbitrati fuerint, vel composuerint seu preceperint. Et quia partes attulerant predictis arbitris peticiones et libellos querimoniales innumerabiles, ita quod cogniciones magni temporis exigebant, et sic non poterant expediri sine magnis laboribus et expensis; spontanee, de plana et plena voluntate et consensu expresso, ex mandato et voluntate ipsorum arbitrorum seu amicabilium compositorum, requisito ad hoc expresso consensu aliorum jobagionum et populorum, dicte partes renunciauerunt omnibus peticionibus seu libellis querimonialibus, et omnibus litibus vel querimoniis motis, hoc saluo et excepto et cum instantia precum petito ab eis, quod solummodo super infrascriptis grauaminibus et oppressionibus, iniurijs et molestijs, seu indebitis exaccionibus jobagionum et populorum cognoscerent et pronunciarent, et excepta causa Benchi clerici de Sala; promittentes sibi ad inuicem, quod de cetero de alijs peticionibus seu libellis querimonialibus porrectis eisdem coram eis vel aliis non mouerent partes aliquam questionem, sed super infrascriptis grauaminibus, et super causa dicti Benchy arbitrarentur, pronunciarunt pronunciantes dictis arbitris vel amicabilibus compositoribus, et inter se ad inuicem partes per stipulacionem, sub pena centum marcarum argenti soluenda a parte, que contra veniret parti arbitrium seu composicionem seruanti, quod quicquid ipsi dixerint, laudauerint, preceperint, arbitrati fuerint, pronunciaverint vel composuerint, totum omnino ratum firmumque habebunt, facient et obseruabunt, emelgabunt et in nullo ullatenus eontradicent, renunciantes omni iuri, et legum seu canonum auxilio; qua pena soluta vel commissa omnia semper maneant intemerata. Actum in domo Hospitalis Sancte Crucis, presentibus partibus, domino Firmino Abbate de Thata, fratre Benedicto Ordinis Predicatorum, et domino Adriano hospitalario eiusdem loci et Valterio Clerico de Sala, et pluribus aliis, anno ab Incarnacione Domini millesimo ducentesimo trigesimo tercio, die kalendarum Junij Indiccione sexta.

(Eredetie bőrhártyán a pannonhalmi főapátság levéltárában.)