In Christi nomine Amen. Anno Nativitatis ejusdem 1212. Indictione prima, die tertia mensis Januarii. Temporibus equidem domini Petri Ziani inclyti Ducis Venetiarum, Dalmatiae et Croatiae, et venerabilis in Christo patris et domini Prodani Episcopi Arbensis, nec non egregii Marci Mauroceno honorabilis Comitis Arbensis etc. In episcopali palatio Arbensi, congregato Capitulo per eumdem dominum Episcopum ad sonum campanae more solito cum Praelatis, videlicet Archidiacono, Archipresbytero, Primicerio, et caeteris Canonicis. Ibique vir nobilis dominus Albertus quondam Matthaei de Gauzigna, tamquam senior stirpis, cum omnibus propinguis dictae domus de Gauzigna sexus masculini civibus Arbensibus, se sistitit in episcopali palatio coram Episcopo Prodano, et Capitulo convocato ibidem. Exposuit suam et eorumdem magnam erga Beatum Stephanum devotionem, et oravit enixe Episcopum et Canonicos, ut concederent facultatem supra turrim ad eos spectantem, et existentem supra Catribum, aedificandi unam ecclesiam ad honorem praedicti Sancti. Item, ut ipse et progenies sexus masculini habeant in eamdem Ecclesiam aedificandam ius patronatus, cum libertate eligendi Capellanum ab Episcopo confirmandum. Episcopus cum suis Praelatis, et toto suo Capitulo ibidem coegregato consensit, ut dicti Gauzigna possent fieri facere ad honorem Beati Stephani ecclesiam, vel capellam cum pactis et conditionibus superius tactis, et inferius contentis; scilicet, quod primo Ecclesia sit congrue dotata; secundo quod Capellanus si non eligatur intra sex menses, electio ad Episcopum intelligatur devoluta.

(Farlati Illyricum Sacrum V. köt. 239. l.)