In nomine Sancte Trinitatis et Indiuidue Vnitatis. Emericus Dei gracia Hungarie, Dalmacie, Croacie, Rame, Bulgarieque Rex in perpetuum. In conspectu conditoris omnium acceptum fore credimus, dum ea, que sacris locis priores donauerunt, posteri seruent perhempniter, et suis amplient donatiuis. Proinde notum facimus vniuersis, quod nos domini Bele quondam Regis Hungarie pie recordacionis, patris nostri karissimi donacionem, quani de tributo fori Strigoniensis ob remedium sue salutis Capitulo Strigoniensis Ecclesie, et fratribus in ea Deo famulatibus fecerat suis litteris mediantibus, ratam habemus atque firmam, et perpetuo confirmamus; et insuper uolentes elemosinam nostram addere perpetuam, ut per hoc a Domino brauium salutis eterne consequamur; locum eiusdem fori Strigoniensis, de consilio Prelatorum et Baronum Regni nostri, cum fundis, areis, terra et edificijs, a portu Danubij minoris, ubi pisces in uiauarijs seruantur, versus orientem directe usque terminum fosse, et abhinc versus lacum aque calide usque ad portum magni Danubij, eidem Ecclesie Strigoniensi, et fratribus residentibus in eadem, dedimus, donauimus et contulimus perhempniter possidendum, cum pleno dominio tenendum et habendum, tali modo, quod hospites in eadem terra et loco nostre donacionis residentes sint distincti a uico Latinorum, et nullo iure in ipso uico residentibus, debeant subiacere; prout in alijs litteris nostris plenius continetur. Sed quia quedam terra vduornicorum nostrorum Strigoniensium, in medio circa ecclesiam Sancti Laurencij remanebat, ipsam ad peticionem venerabilis patris Job Archiepiscopi Strigoniensis, dilecti et fidelis nostri, predictis fratribus intuitu fidelitatis eorum, et pro nostra ac eiusdem patris nostri salute sempiterna, donauimus perhempniter possidendam, ne predicti vduornici nostri habeant aliquando causam, ipsos fratres perturbandi. Cuius terre quantitas et situs taliter distinguitur; videlicet a parte orientali est via, qua itur ad portam; a parte septemtrionali fossatum usque ad Danubium minorem; a parte vero meridionali, locus fori infra ecclesiam Sancti Nicolai, tendens vsque ad Danubium minorem, vbi pisces seruantur et uenduntur. Vt igitur hec nostra donacio perpetuam obtineat firmitatem, presentes litteras nostro fecimus sigillo roborari. Datum per manus Desiderij Prepositi Scybiniensis, dilecti et fidelis nostri, anno Domini millesimo ducentesimo secundo, Regni autem nostri sexto. Venerabili Job predicto Strigoniensi Archiepiscopo, Reuerendo Saul Colocensi Archiepiscopo; Kalano Quinque Ecclesiensi, Vgrino Jauriensi, Adriano Transiluano, et alijs Episcopis Ecclesias Dei gubernantibus; Myke Palatino et Bichoriensi Comite; Nicolao Vayuoda; Benedicto Bachiensi, Tiburcio Budrugiensi, Thoma Scepusiensi, et Both Musuniensi Comitibus, et alijs Comitatus nostros tenentibus et honores.
(Diplomatarium Széchenyianum a nemz. muzeum könyvtárában 4-o Lat. 1280. sz. a. I. köt. 143. l. és II. köt. 354., igazítva Knauz szerint M. Sion II. köt. 126. l.; V. ö. Fejér Cod. Dipl. II. köt. 391. l.)