Caelestinus Episcopus servus servorum Dei, venerabilibus fratribus Scardonensi et Tiniensi Episcopis salutem et Apostolicam benedictionem. Cum venerabilis frater noster Archiepiscopus vester, et ejus Canonici, in nostra essent praesentia constituti super decima parte decimationum, quae de toto Archiepiscopatui extra civitatem proveniunt; ipsi Canonici adversus eumdem Archiepiscopum coeperunt proponere quaestionem, et eam ab ipso cum instantia postulare. Verum quia non venerant ad hoc sufficienter instructi, vestro duximus examini committendam et fine debito terminandam. Ideoque fraternitati vestrae per Apostolica scripta mandamus, quatenus partibus convocatis audiatis, quae hinc inde duxerint proponenda; et causam inter eos justitia, vel concordia terminetis. Datum Laterani XVII. kalendas Julii, Pontificatus nostri anno sexto.

(Farlati, Illyricum Sacrum III köt. 227. l.)