In nomine Sancte Trinitatis et Individue Unitatis. Bela Dei gracia Hungarie, Dalmacie, Chroacie, Rameque Rex in perpetuum, Quoniam Diuine miseracionis operatur effectus, ut pro temporalibus eterna, pro terrenis celestia, pro casuris perhenniter mansura valeant comparari; quilibet Catholicus huiusmodi Sancte negociacionis studia diligencius exercere, et ad imputrescibilem thesaurum iuxta modulum facultatis sue per manus pauperum aliquid debet aggregare. Eapropter et nos in celesti gazophilacio thesaurizare cupientes, affectu pietatis prouocati, Monasterio Beati Martini de Sacro Monte Pannonie ad sustentationem fratrum ibidem Deo serviencium tres naues saliferas liberas contulimus, ea videlicet libertate priuilegiatas, ut ab ipso salifodine loco usque ad iam dictum Montem Pannonie, tam per aquam, quam per terram nemo de salibus in illis tribus nauibus delatis tributum exigere, uel aliqua alia dampnifica exaccione audeat eas attemptare, uel infestare. Vt igitur huius nostre donacionis pagina perpetuis temporibus inconcusse stabilitatis robur optineat, presentis eam scripti patrocinio communimus; statuentes, ne quis unquam contra eam presumat aliquid attrectare, aut temerarie contradicere. Datum per manus magistri Cathapani Albensis Prepositi, Aule Regie Cancellarii anno ab Incarnacione Domini M° C° nonagesimo II. Venerabili Job Archiepiscopo Strigoniensi existente. Saule (így) Colocensi Archiepiscopo, Petro Agriensi Episcopo, Vgryno Geuriensi Episcopo, Adriano Vltrasiluano Episcopo, Crispino Senadiensi Episcopo, Blasio eiusdem loci Abbate. Mog Palatino Comite et eodem Bachyensi; Dominico Curiali Comite, et eodem Budrigyensi; Andrea Comite de Suprun, Both Comite de Bychor, Cornelio Geuriensi Comite.

(Az u. n. vörös könyvből a pannonhalmi főapátság levéltárában.)