Alexander Episcopus servus servorum Dei venerabilibus fratribus Spalatensi Archiepiscopo Apostolicae Sedis Legato, et Michaeli Traguriensi Episcopo, salutem et Apostolicam benedictionem. Cum dilectus filius Raymundus de Capella Subdiaconus noster a praesentia carissimi in Christo filii nostri W(ilhelmi) illustris Siciliae Regis, ad quem fuerat a nobis et a dilecto filio nostro Jacobo Sanctae Mariae in Cosmedin Diacono Cardinali transmissus, rediret ad nos, piratae, qui erant in sagettia castri de Sevenico, in qua duo Comites erant, Nestros videlicet, et Perlat, in ipsum, et socios suos praesumpserunt violentas manus iniicere, et ei quidquid habebat in navi, valens ultra sexaginta marchas argenti, et litteras etiam nostras, et illas etiam, quam praefatus Rex nobis mittebat, ut scriptum de d - - - - pecuniae ipsius Cardinalis, ei turpiter et inhoneste auferre minime dubitarunt. Super quo itaque tanto movemur amplius, et turbamur, quanto id amplius in nostram injuriam respicit, et contemptum; cum tantam jacturam, et injurias cujuslibet Clerici, nedum Subdiaconi nostri non possemus sub taciturnitate, et silentio praeterire. Quoniam igitur sustinere non possumus, nec debemus, ut tanta praesumptio et excessus incorrectus remaneat, fraternitati vestrae per Apostolica scripta praecipiendo mandamus, et mandando praecipimus, quatenus illos duos Comites, et piratas, et raptores alios, qui in praedicta sagettia fuerunt, quantocius moneatis, ut tam litteras, quam etiam ablata nuncio memorati Subdiaconi nostri latori, praesentium, sine diminutione, et dilatione cum expensis, quas propter hoc facere coactus est, restituant; et castrum de Sevenico, cujus illa sagitta fuit, ad restituendum quicquid de his ad suas manus devenit, diligenter inducatis. Si vero ad commonitionem commendati vestram id non fecerint, eosdem et omnes, qui tunc in praedicta sagettia fuerunt, contradictione et appellatione cessante, publice accensis candelis auctoritate nostra excommunicetis; et si nec sic infra decem dies resipuerint, in civitate Sevenici, et in alia terra Communis Sevenici, si ejus fuit ipsa sagettia, omnia Divina, praeter baptisma parvulorum et poenitentiam, prohibeatis officia celebrari. lllos autem, qui in praedictum Subdiaconum nostrum violentas manus injecerunt, sublato appellationis remedio publice excommunicatos sine dilatione denuncietis, et eos faciatis sicut excommunicatos vitari, donec universa ablata restituant, et cum litteris vestris nobis, et prefato Cardinali, nec non etiam eidem Subdiacono nostro satisfacturi ad Apostolicam Sedem accedant. Qualiter autem idem nuncius cum his, quae recuperaverit, ad nos secure possit redire, studeatis sollicite providere. Porro, si uterque Vestrum - - - sequendis interesse non poterit, alter et nihilominus exequatur.

(Ugyanott III. köt. 197. l.)