Eugenius Episcopus servus servorum Dei venerabili fratri A(ndreae) Ragusiensi Archiepiscopo salutem et Apostolicam benedictionem. Cognito fraternitatis tuae statu per latorem presentium S. presbiterum tuum, qui ad nos Domino ductore pervenit, infirmitati corporis tui debita cordis infirmitate compatimur, sed gaudemus, quia in huius ignis camino conditor omnium Dominus rubiginem dilectorum suorum expurgans, te in filiorum suorum numero collocare dignetur. Tu vero inter haec - - - a - - - - ad patriam erigens exilii praesentis angustias - - - oculis cordis excogita, et plebem Dominicam regimini tuo commissam - - - et exemplo gubernare et fovere non desinas. In lucrandis animabus invigila - - - r - - - - rectitudinem esto sollicitus, utilitatem Ecclesiae iniuste perire vel deteriorari nulla negligentia vel surreptione permittas, et in certis bonis operibus sacerdotali sollicitudine ita Domino largiente invigila, ut ante tribunal aeterni judicis constitutus fructum bonae operationis, qui ad mercedem tuam pertinet, eidem Redemptori nostro, in quo laetari possit, exhibeas. Illud vero, unde a nobis sollicite indulgentiam postulas, scilicet quod ex debito juramenti Apostolorum limina visitare astringeris, et gravi aegritudine praepeditus id per te ipsum hactenus non potuisti efficere, tuae fraternitati ex Apostolicae Sedis benignitate remittimus. Sed cum opportunitatem tibi Clementia Divina permiserit, si per te ipsum non poteris, per tuum Nuncium Matrem tuam Sanctam Romanam Ecclesiam devotione debita studeas visitare, quatenus nos de tuae habitudinis statu, et tu de his, quae circa nos aguntur, possis praestante Domino informari, de - - - - pro visitatione tua fraternitati tuae gratias agimus. Datum - - - - X. kalendas Octobris - - - -

(Farlati Illyricuin Sacrum IV. köt. 64. l.)