Ladislaus Dei gracia Hungarie, Dalmacie, Croacie, Rame, Seruie, Gallicie, Lodomerie, Cumanie, Bulgarieque Rex vniuersis Christi fidelibus presentes litteras inspecturis salutem in Domino sempiternam. Ad hoc Deus super specula eminenti Majestatem Regiam protulit et euexit, vt in apicibus summi culminis eleuata perspicuis circumspeccionis oculis contempletur merita singulorum, et si ex debito generalis gubernaculi vniuersaliter se obnoxium respiciat vniuersis; illos tamen, quos approbauit fidelitas, sedula seruiciorum extulerunt merita, suorum commendauit obsequium indefessum, Regalem expedit prosequi munificenciam amplioribus donatiuis et commendacionis magnificis titulis amplioris, vt exemplo hujusmodi in ceteris zelus fidelitatis (et) obsequiorum feruens desiderium amplietur. Hinc est quod Comes Mathias, Ireneus, Olber, Johannes, Paulus et Stephanus fratres ejusdem Mathie Comitis, Majestatis nostre presenciam adeuntes implorare clemenciam Regiam supplicacione humili curarunt, super eo videlicet, quod graciam confirmacionis, approbacionis, ratihabicionis et prorogacionis Regie donacionis de persona ipsius Comitis Mathie in fratres suos predictos facte, si ipsum absque heredibus masculinis decedere contingeret, robore Regalis priuilegii miniremus, prefatam graciam et munificenciam eisdem a nobis factam per quasdam nostras patentes litteras in nostram memoriam et pleniorem noticiam reducentes. Quarum siquidem tenor talis est:
Ladislaus Dei gracia Rex Hungarie stb. (következik a király adománya mint 155. sz. a.)
Nos igitur ex sollicitudine Regalis officii recensentes fidelitatum opera, obsequiorum merita, actus strenuos militares, in quibus exercendis et expediendis temporibus Regum Illustrium, Bele videlicet Incliti aui nostri, et Stephani patris nostri recordacionum felicium, et nostris desudarunt, ac in diuersis expedicionibus tam generalibus quam particularibus et confiniorum Regni nostri deffensionibus mortis pericula non pauentes non sine sui sanguinis effusione sudoribus bellicis militarunt et fidelitatis indefesse ardores animo conceptos exhibicione operum luce clarius demonstrarunt; prefatas possessiones vniuersas et singulas a predicto Rege Bela, Inclyto auo nostro, suis meritoriis seruiciis et fidelitatis operibus acquisitas et a predicto patre nostro Rege Illustri ratificatas approbatas et confirmatas, authoritate presencium approbamus et valituras jure perpetuo confirmamus, et nichilominus ad majorem cautelam et abundanciam stabilitatis perpetue de nouo conferimus, concedimus et donamus, prorogacionem eciam collacionis possessionum de persona ipsius Comitis Mathie, si eum siue heredibus masculinis, quod absit, decedere contingeret, in personas fratrum suorum factam et deriuatam, munimine litterarum presencium innouamus ita, vt immediate nulla alia collacione Regia expectata in prefatos fratres suos ex nunc vt ex tunc ex munificencia Regia possessiones prehabite sint translate. Vt igitur hujus rei series robur obtineat perpetue firmitatis, presentes litteras nostras concessimus duplicis sigili nostri munimine roboratas. Datum per manus viri discreti magistri Batholomei aule nostre Vice-Cancellarii dilecti et fidelis nostri anno Domini millesimo ducentesimo octuagesimo tercio, quinto decimo kalendas Maji, indiccione vndecima, Regni autem nostri anno vndecimo
(Szarvaskendi Sibrik Ferencz peréből Niczky, Szecsődy stb. családbéliek ellen, mely 1746. september 1-jén felvétetett, a k. magyar Curia levéltárában 4. 3804. szám alatt.)