Nicolaus Episcopus seruus seruorum Dei, venerabilibus fratribus Philippo Firmano Apostolice Sedis Legato, et Andree Agriensi Episcopis salutem et Apostolicam benedictionem. Cum venerabilem fratrem nostrum Lodomerum, tunc Episcopum Waradiensem, Electum Strigoniensem a vinculo, quo Waradiensi tenebatur Ecclesie absolutum ad Strigoniensem Ecclesiam, tunc pastore vacantem de fratrum nostrorum consilio et Apostolice plenitudine potestatis duximus transferendum, nos de industria dilectorum filiorum magistrorum Romani Huntensis et Angeli Nitriensis Archidiaconorum in eadem Ecclesia Strigoniensi confisi, pallium, plenitudinem videlicet Pontificalis officii, cum instancia postulatum, de corpore Beati Petri sumptum vobis per eosdem Archidiaconos presentandum, ac per vos vel alterum vestrum sub certa forma dicto Electo tradendum providemus destinandum, ab eis Archidiaconis recepto de prosequenda fideliter presentatione huiusmodi iuramento. Quocirca fraternitati vestre per Apostolica scripta mandamus, quatenus pallio ipso recepto, illud eidem Electo auctoritate nostra tradatis iuxta formam, quam vobis sub bulla nostra mittimus interalusam, recepturi ab eo postmodum nostro et Ecclesie Romane nomine fidelitatis solite iuramentum secundum formam, quam vobis sub eadem bulla providimus transmittendam; formam autem juramenti, quod ipse prestabit, nobis de verbo ad verbum per eiusdem patentes litteras suo sigillo signatas per proprium nuntium quantocius destinetis. Intendimus quoque, quod tu, frater Episcope Firmane, premissa per te ipsum, si poteris, exequaris, et si extra legationem tuam, vel aliquo casu impeditum te fore contingeret, tu, frater Episcope Agriensis, ad premissorum executionem mandati nostri forma servata procedas. Datum Rome apud Sanctum Petrum Nonis Maii (Pontificatus nostri) anno tertio.

(III. Miklós pápa Regestáiból, Theiner id. m. I. k. 346. l.)