Nicolaus Episcopus seruus seruorum Dei, venerabili fratri Philippo Episcopo Firmano Apostolice Sedis Legato salutem et Apostolicam benedictionem. Cum te ad Ungarie, Polonie, Dalmatie, Croatie, Rame, Servie, Lodomerie, Galitie et Cumanie partes tibi commisso inibi plene legationis officio pro arduis negotiis destinemus in desideriis nostris geritur, ut submotis impedimentis quibuslibet huiusmodi negotia prosperum consequantur effectum. Quare iniungendi dilectis filiis fratribus Predicatorum, Minorum, Cisterciensis, Cluniacensis, Promonstratensis, Sancta Marie Theutonicorum, Sancti Benedicti, Hospitalis Sancti Johannis Jerosolomitani et aliorum Ordinum infra tue legationis terminos constitutis, quecumque prosecutioni officii vel utilitati negotiorum tibi commissorum videris expedire, contradictores per censuram ecclesiasticam appellatione postposita compescendi non obstantibus aliquibus indulgentiis eis, quibus hec iniungenda duxeris specialiter, aut personis eorumdem ordinum generaliter ab Apostolica Sede sub quacumque forma verborum concessis, per quas super hoc in nullo se tueri valeant, et de quibus oporteret in nostris litteris plenam et expressam fieri mentionem, fraternitati tue plenam et liberam concedimus auctoritate presentium facultatem. Datum Viterbii X. Kalendas Octobris. Pontificatus nostri anno primo.

(III. Miklós Pápa Regestáiból, Theiner id. m. 1. k. 335. l.)