Indue mente virum, fili ac socie praedilecte ! ecce, jam acceptabile tempus instat, in quo ulcisci poterimus atroces injurias callidi inimici Regis Bohemiae, qui fidei pulchritudine a se longius exulata, adhuc occultas contra vos et nos machinatur insidias malignandi. Exsurgat igitur princeps praepotens, si acta voluerit vindicare priora, et antiquam per fidiam hostis perfidi ad memoriam revocet, nec moretur, sed postpositis negotiis quibuslibet quantumcunque arduis, ad metas terrarum nostrarum veniat indilate; illuc enim vobis procul omni dubio occurremus, ordinaturi et tractaturi vobiscum, quomodo et qualiter contra dictum Regem Bohemiae in praefato negotio procedere debeamus. Et ut ad suas ulciscendum injurias una nobiscum vestra potestas Regia ferventius animetur, in illius amicae societatis et filialitatis vinculo, quo conjungimur, vos monemus, ut ad praedictas metas vestra Magnificentia veniat, et non tardet, nec a felici unione nostrae amicitiae resipiscat.

(Bodmann id. m. 40. l. V. ö. Fejér. Cod. Dipl. V. k. 2. r. 320. l.)