Nos Nicolaus de Gara Regni Hungarie palatinus et iudex Comanorum, Memorie commendamus, quod in congregacione nostra generali universitati nobilium comitatus Borsodiensis, feria secunda proxima ante festum beate Margarete virginis et martiris prope uillam Kaza celebrata, Markus et Mathyas fily Johannis fily Pauli de Alsoubarch personaliter de medio aliorum exsurgendo proposuerunt eo modo, quod eadem possessio Alsoubarch semper et ab antiquo suis antecessoribus iure hereditario pertinuisset et nunc ipsis pertineret, et hoc vicecomiti iudicibus nobilium iuratisque assessoribus dicti comitatus constaret evidenter, petens nos cum instancia ut ydem vicecomes Judices nobilium iuratique assessores dicti comitatus qualem de premissis scirent per nos requisiti faterentur veritatem, cumque nos eosdem uicecomitem Judices nobilium iuratosque assessores super premissis requisitos habuissemus idem ad fidem eorum deo debitam fidelitatemque domino nostro regi sueque sacre corone regie pro dicenda ueritate et iusticia obseruanda tacto uiuifice crucis ligno nobis prestitam unanimi et concordi testificacione affirmarunt, quod predicta possessio Alsoubarch semper et ab antiquo iure hereditario eisdem Mathye et Marko ac eorum antecessoribus pertinuisset et nunc deberet pertinere. In cuius assercionis testimonium presentes literas nostras eisdem Mathye et Marko duximus concedendas communi iusticia suadente. Datum duodecimo die congregacionis nostre predicte in loco memorato, anno domini M^mo ccc^mo lxxx^mo primo.

Papíron, hátlapján kerek pecsét nyomaival; eredetije Lapispatakon, a Keczer cs. ltárában. Közli: Kiss Béla.