Nos Johannes prepositus et Conuentus ecclesie sancte Crucis de lelez, Memorie commendamus per presentes, Quod Johannes filius dominici de Benky ad nostram personaliter accedendo presenciam confessus est viua voce, quod ipse pro euitandis quibusdam suis necessitatibus ipsum ad presens vrgentibus dimidietatem possessionis sue Monyros vocate a parte meridionali versus fluuium Tyza, scilicet duas lineas, quas prius mediantibus litteris diuisionalibus seruasset, adiacentem, cum omnibus suis vtilitatibus et quibuslibet pertinencys, vtpote aquis, stagnis, piscatorys et siluis, incipiendo ab octauis festi beati Mychaelis archangeli usque ad decimam annualem reuolucionem affuturam, Ladislao filio Stephani de Anarch presencialiter coram nobis astanti et recipienti in quinquaginta florenis auri, vt dixit, plene ab ipso habitis, pignori obligasset, et coram nobis obligauit tenendam, vtendam et percipiendam, Isto modo, vt abhinc vsque prefixum terminum decime annualis reuolucionis nullo modo possit redimere ab eodem. Elapsa autem ipsa annuali decima reuolucione, quandocunque dictam dimidietatem pignoraticiam in dictis quinquaginta florenis auri redimere voluerit ab eodem ladislao, semper liberam habebit redimendi facultatem. Ipseque Ladislaus eandem sibi reddere et remittere rehabita sua pecunia in promtis florenis auri tenebitur et debebit, omni lite et accione postergata. Medio autem tempore eundem Ladislaum in dominio ipsius dimidietatis possessionarie contra Stanizlaum fratrem suum vterinum pacifice conseruare tenebitur et quiete. Si autem hoc facere non posset, extunc alia porcio sua possessionaria totalis in possessione Monostur vocata in Comitatu Bihoriensi existenti habita loco eiusdem modo premisso cum suis omnibus vtilitatibus et quibuslibet pertinencys a parte meridionali deuoluatur possidenda tenenda et vtenda ladislao prenotato vsque terminum supradictum. Et quod si hoc idem fieri non posset, extunc predictos quinquaginta florenos auri ipsi ladislao plene et integre reddere et restituere tenebitur Johannes prenotatus. Alioquin si secus facere attemptaret extunc in dupplo ipsorum quinquaginta florenorum conuictus habebitur contra ladislaum sepedictum; ad quod se sponte obligauit coram nobis. datum die dominico proximo post festum exaltacionis sancte Crucis, anno domini M°. ccc°. lx°. octauo.

Hártyán, hátlapján kerek pecsét nyomaival; eredetije Lapispatakon, a Keczer cs. ltárában. Közli: Nagy Gyula.