Kaolus (így) dei gracia Hungarie, Dalmacie, Croacie, Rame, Seruie, Gallicie, Lodomerie, Comanie, Bulgarieque Rex. Omnibus xpi fidelibus presens scriptum inspecturis salutem in eo qui Regibus dat salutem. Licet Regia benignitas singulorum sibi seruiencium merita oculo perspicue contemplacionis debeat intueri, illos tamen quorum experta probitas et laudata est in prosperis et aduersis, prosequi debet munificencia largiori. Ea propter Ad vniuersorum, tam presencium quam futurorum, harum serie volumus noticiam pervenire. Quod Petrus banus filius Bothond et magister Mychael filius eiusdem, fideles nostri, ad nostram accedentes presenciam, et sue fidelitatis seruicia longi temporis laboribus nobis impensa rememorantes et exponentes quandam terram seu possessionem Zenthlazlofelde vocatam simul cum Ecclesia, que in honore beati Regis Ladizlai in medio eiusdem terre est constructa, terram scilicet Peteu fily Stephani, fily Paznany de Leek, infidelis nostri, terris et possessionibus ipsorum vicinam et contignam, pro fidelibus suis seruicys sibi dari et conferri perpetuo a nobis postularunt. Nos itaque secundum quod Regie magnitudinis postulat officium et requirit, vt vniuscuiusque merita animo meciantur pietatis, et hys quos opera sue virtutis Regali remuneracione dignos efficiunt grata debeat reddere premia meritorum. Consideratis fidelitatibus et seruiciorum meritis multa laude dignis, que ydem Petrus banus, et magister Michael filius eius, adhuc a primis et antiquis diebus illius temporis, quo in Regnum nostrum Hungarie iure nobis geniture debitum intrauimus, nostro lateri ingiter adherendo et in nostris ac Regni nostri negocys tam prosperis quam aduersis, dubys fortune casibus se submittendo continuis locis et temporibus, que longum esset suo modo per singula enarrare et presentibus inseri tediosum, cum supreme fidelitatis desiderio impendere studuerunt, et de die in diem se totum ad beneplacita Regie maiestatis exponere non desistunt, volentes ipsi Petro bano et magistro Mychaeli filio suo predictis pro huiusmodi fidelitatibus et seruicys spectabilibus Regio occurrere cum fauore, licet multa plura et maiora mererentur, predictam terram Zenthlazlofelde, simul cum ecclesia lapidea et suis atinencys ac vtilitatibus vniuersis sub antiquis metis et terminis nostre Regie collacioni deuolutam, eisdem Petro bano et Magistro Michaeli predictis et per eos suis heredibus heredumque suorum successoribus, a prefato Peteu et ipsius heredibus, ob nota infidelitatis ipsius auferentes, quia parui meriti putaretur fidelitas, si infidelitas debitam vindicte euaderet vlcionem, dedimus, donauimus, tradidimus et contulimus iure perpetuo et irreuocabiliter possidendam, tenendam et habendam. In cuius rei memoriam perpetuamque firmitatem, presentes litteras nostras concessimus, Duplicis Sigilli nostri munimine roboratas. Datum per manus discreti viri magistri Johannis Albensis ecclesie prepositi Aule nostre vicecancellary et archidyaconi de Kukulleu dilecti et fidelis nostri. Anno domini millesimo ccc° decimo Octauo, sedecimo kalendas february. Regni autem nostri Anno similiter decimo octauo.
Hártyán, vörös-sárga selyem zsinóron függő kettős pecsét töredékével; eredetije Nyitra vármegyében, a Zerdahelyi cs. ltárában, A. 1. 29. Közli: Tagányi Károly.