Nos Jacobus Vicepotesta, Judicesque, Consiliarii, totaque Communitas Scenniensis significamus quibus expedit universis, quod cum frater Henricus, monachus Toplicensis 46electus eiusdem Civitatis, in ipsam veniens Civitatem, vice et nomine domini Abbatis de Toplica, literas Magistri Petri Archidyaconi Zagrabiensis presentasset, continentes: quod domus suas, quas dominus Belzaninus in supradicta Civitate ab eodem Magistro Petro tenebat et possidebat, cum omnibus utilitatibus suis et pertinenciis ad manus predicti domini Abbatis, vel ipsius hominis ad hoc per eundem deputati deberet assignare. Qui quidem Belzaninus ad nostram veniens presenciam claves predictarum domorum ad manus ipsius fratris Henrici porrigendo, ipsas domos sine aliqua contradiccione assignavit, et ipsum fratrem Henricum coram Archidyacono, et toto Capitulo, ac nobis, in corporalem possessionem ipsarum domorum introduxit, statuens coram nobis debitores pro precio ipsarum domorum; et cum tempus solucionis adveniret, eidem domino Abbati vel fratri Henrico solvere tenerentur pro domibus supradictis sive alicui alteri, cui dominus Abbas deputaverit vel decreverit. In cuius rei testimonium et evidenciam ampliorem literas nostras concessimus sigilli nostri munimine roboratas. Nam virorum sapientum decrevit industria, ut quitquid in presenti geritur, vivacibus elementorum indiciis in posterum transferatur. Datum et actum in Scennia, ante ecclesiam Sancti Johannis Baptiste anno Domini MCC septuagesimo primo.

(Tkalcsics, Monum. historica Episcopatus Zagrabiensis I. köt. 160. l.)