Bela dei gracia Vngarie, Dalmacie, Croacie, Rame, Seruie, Gallicie, Lodomerie, Cumanieque Rex omnibus Christi fiedlibus tam presentibus quam futuris salutem in omnium salvatore. Regalis misericordie immensitas quamvis ex sui providencia sublimia prospiciat alto consilio providendo, tamen humilia respicit, a suis oneribus sublevando. Proinde ad universorum noticiam tam presencium quam futurorum harum serie volumus pervenire: quod cum populi venerabilis patris Thymotei Episcopi Zagrabiensis in Comitatu de Vrbaz existentes per continuos descensus Baronum nostrum, et per Comitem de Vrbaz, ac per Curiales Comites eiusdem, qui fuere pro tempore, se conquerentur fuisse plurimum aggravatos; nos qui Ecclesias Dei et ad easdem spectantes progere consuevimus et fovere, ne in eisdem Divine laudis organa suspendantur, sed Divini cultus nominis amplietur, ad instanciam venerabilis patris Tymotei, miseracione Divina Episcopi Zagrabiensis, dilecti et fidelis nostri, iam dictis populis et iobagionibus suis talem graciam et misericordiam duximus faciendam: quod nullus Baronum nostrorum descensum super eosdem presumant facere violentum, et ut servicia sua iam dicto venerabili patri debita, iidem populi et iobagiones facilius impendere valeant, de aliis gravaminibus expediti, de gracia concessimus speciali, quod Comites de Vrbaz, vel Curiales Comites eiusdem, pro tempore constituti, in ullo casu eosdem valeant, iudicare, prout libertas aliorum populorum eiusdem venerabilis patris id requirit, cum ipsos a iudicio Parochialis Comitis omnino eximentes nostro et eiusdem Episcopi iudicio duxerimus per omnia reservandos; ita videlicet, quod si dictus Episcopus in reddenda iusticia querelantibus contra ipsos negligens fuerit ac remissus, extunc idem Episcopus, et non populi nec iobagiones sui supradicti, ad nostram citabitur presenciam ad terminum competentem. Ut igitur hec nostre concessionis series robur obtineat perpetue firmitatis, nec per quempiam processu temporum retractari valeat aut in irritum quoquomodo revocari, presentes concessimus litteras duplicis sigilli nostri munimine roboratas. Datum per manus Magistri Demetrii Prepositi Albensis, aule nostre Vicecancellarii, dilecti et fidelis nostri anno Domini MCCLXIX. Regni autem nostri anno XXX. quarto.

(Tkalcsics, Monum, hist. Episc. Zagrabiensis I. köt. 146. 1.)