Clemens Episcopus seruus seruorum Dei venerabili fratri ... Episcopo Traguriensi eiusque successoribus canonice substituendis in perpetuum. In eminenti Apostolice Sedis specula, licet immeriti, disponente Domino constituti, fratres nostros Episcopos, tam propinquos quam longe positos, fraterna debemus charitate diligere, et Ecclesijs sibi a Deo commissis pastorali sollicitudine providere. Quocirca, venerabilis in Christo frater Episcope, justis postulationibus tuis clementer annuentes, et Ecclesiam Sancti Laurentii Traguriensem, cui auctore Deo preesse dinosceris, sub Beati Petri et nostra protectione suscipimus, et presentis scripti privilegio communimus; statuentes, ut quascumque possessiones, quecumque bona eadem Ecclesia in presentiarum juste et canonice possidet, aut in futurum concessione Pontificum, largitione Regum vel Principum, oblatione fidelium, seu aliis iustis modis prestante Domino poterit adipisci, firma vobis vestrisque successoribus et illibata permaneant. In quibus hec proprijs duximus exprimenda vocabulis: Locum ipsum, in quo prefata Ecclesia sita est, cum omnibus pertinentijs suis; Monasterium Sancti Nicolai, Sancti Michaelis ac Sancti Jacobi; Ecclesias in castro de Sibenico cum omnibus pertinentiis earundem, decimas et puidquid juris habet ibidem Ecclesia Traguriensis; Ecclesias cum decimis, parochiis et pertinentiis suis, sitas in locis que Drid, Gusterna et Dubrovaz volgariter nuncupantur; ac jurisdictionem temporalem, quam Ecclesia prefata in locis prefatis noscitur obtinere; Ecclesias cum pertinentijs suis, terras, possessiones et decimas in villis de Neveste, Rodosich, Gradez, Ostroc, Dpellan et Sancti Petri vulgariter appellatis; decimas, et quidquid juris Ecclesia Traguriensis obtinet in Comitatu Zagorie, cum terris, pratis, vineis, nemoribus, usvagiis et pascuis, in bosco et plano, in aquis et molendinis, in viis et semitis, et omnibus aliis libertatibus et immunitatibus suis. Ad hec cimiteria Ecclesiarum et ecclesiastica beneficia nullus hereditario jure possideat; quod si quis facere presumpserit, canonica censura compescatur. Preterea quod communi assensu Capituli tui, vel partis consilii sanioris in tua Diocesi per te vel successores tuos fuerit canonice institutum, ratum et firmum volumus permanere. Prohibemus insuper, ne excommunicatos vel interdictos tuos ad officium vel communionem ecclesiasticam sine conscientia et assensu tuo quisquam admittat, aut contra sententiam tuam canonice promulgatam aliquis venire presumat, nisi forte periculum mortis immineat, aut dum presentiam tuam habere nequiverit, per alium secundum formam Ecclesie, satisfactione premissa oporteat ligatum absolvi. Sacrorum quoque Canonum auctoritate sequentes statuimus, ut nullus Episcopus vel Archiepiscopus absque tuo assensu conventus celebrare, causas etiam et ecclesiastica negotia in Traguriensi Diocesi, nisi per Romanum Episcopum vel eius Legatum fuerit eidem iniunctum, tractare presumat; nisi forsan Metropolitanus eius aliquod premissorum fecerit in casibus sibi a jure concessis. In Ecclesijs quoque Traguriensis Diocesis, que ad alios pleno jure non pertinent, nullus clericum instituere vel destituere, aut sacerdotem preficere sine consensu Diocesani presumat. Decernimus ergo, ut nulli omnino hominum liceat prefatam Ecclesiam tenere, perturbare; aut eius possessiones auferre, vel ablatas retinere, minuere, seu quibuslibet vexationibus fatigare; sed omnia integre conserventur, eorum, pro quorum gubernatione et sustentatione concessa sunt, usibus omnimodis profutura, salva Sedis Apostolice auctoritate, et in predictis decimis moderatione Concilij Generalis. Si qua igitur in futurum ecclesiastica secularisve persona hanc nostre constitucionis paginam sciens, contra eam temere venire tentaverit, secundo-tertioue commonita, nisi reatum suum congrua satisfactione correxerit, potestatis honorisque sui careat dignitate, reamque se Divino judicio existere de perpetrata iniquitate cognoscat, et a Sacratissimo Corpore et Sanguine Dei et Domini Redemptoris nostri Jesu Christi aliena fiat, atque in extremo examine districte subiaceat ultioni. Cunctis autem eidem loco jura sua servantibus sit pax Domini nostri Jesu Christi, quatenus et hic fructum bone actionis percipiant, et apud districtum judicem premia eterne pacis inveniant.
Amen. Amen. Amen.
(P. H.) (Pápai jegy.)
Ego Clemens Catholice Ecclesie Episcopus subscripsi.
Ego Odo Tusculanus Episcopus subscripsi.
Ego Stephanus Prenestensis Episcopus subscripsi.
Ego frater Johannes Portuensis et Sancte Rufine Episcopus subscripsi.
Ego Henricus Ostiensis et Velletrensis Episcopus subscripsi.
Ego Ancherus tituli Sancte Praxidis Presbyter Cardinalis subscripsi.
Ego Guillelmus tituli Sancti Marci Presbyter Cardinalis subscripsi.
Ego Ricardus Sancti Angeli Diaconus Cardinalis subscripsi.
Ego Jacobus Sancte Marie in Cosmedin Diaconus Cardinalis subscripsi.
Ego Gottifredus Sancti Georgij ad Velum Aureum Diaconus Cardinalis subscripsi.
Ego Ubertus Sancti Eustachii Diaconus Cardinalis subscripsi.
Datum Viterbii per manus Magistri Michaelis Sancte Romane Ecclesie ViceCancellarij idibus Junii indictione IX. Incarnationis Domince anno MCCLXVI. Pontificatus domini Clementis IIII. anno secundo.
(Farlati Illyricum Sacrum IV. köt. 350. 1.)