Alexander Episcopus servus servorum Dei venerabili fratri ... Episcopo Traguriensi salutem et Apostolicam benedictionem. Exposuit nobis tua fraternitas, quod clerici de Castro Sibenico tue Diocesis lata in eos a bone memorie Episcopo Traguriensi predecessore tuo pro denegata sibi ab ipsis obedientia, escommunicationis sententia sint ligati; idemque predecessor observari eandem sententiam usque ad satisfactionem condignam obtinuit a Sede Apostolica demandari; quorum clericorum quidam susceperunt ordines, et Divina celebrant officia sic ligati, quare super iis eorum provideri saluti humiliter postulasti. De tua itaque circumspectione plenam in Domino fiduciam obtinentes, presentium tibi auctoritate concedimus, ut eosdem excommunicatos absolvas hac vice abhuiusmodi excommunicationis sententia, iuxta formam Ecclesie vice nostra; iniungens eis quod de iure erit iniungendum. Cum illis autem ex eis, qui juris ignari aut immemores facti, absolutionis beneficio non obtento susceperunt ordines, Divina officia celebrarunt, iniuncta eis pro modo culpe penitentia competenti, eaque peracta, liceat tibi de misericordia, que superexaltat judicio, prout eorum saluti videris expedire, dispensare. Si vero prefati excommunicati scienter, non tamen in contemptum clavium talia presumpserint, eis per biennium ab ordinum executione suspensis, et imposita ipsis penitentia salutari, eos postmodum, si fuerint bone conversationis et vite, ad gratiam dipensationis admittas. Datum Anagnie VII. kalendas Aprilis, Pontificatus nostri anno sexto.

(Farlati, Illyricum Sacrum IV. köt. 346. l.)