254. A velenczei köztársaság és a templomrend közti egyezkedés azon károsítások tárgyában, melyeket velenczei kalmárok a velenczei felsőség alatt álló néhány személy Szegnában szenvedtek. 1248.

Transactio inter Dominium Venetiarum et Magistrum Domus Militie Templi pro damnis illatis Venetis quibusdam a Templariis in captione et combustione civitatis Senie.

In nomine Dei Eterni Amen. Anno ab Incarnatione Domini nostri Jesu Christi millesimo ducentesimo quadragesimo octavo, die sexto exeunte mense Aprili, indictione sexta, Rivoalti, in palatio Ducatus Veneciarum. Presentibus testibus rogatis nobilibus viris dominis Nicolao Donato et Marco Cornario Procuratoribus Sancti Marci, Philippo Contareno, Johanne Gradenico, Andrea Delfino, Johanne Teupolo et aliis multis. Hec est concordia inita inter dominum Jacobum Teupolum, Dei gratia inclitum Ducem Veneciarum ex una parte, suo nomine et Comunis Veneciarum, et fratrem Jacobum de Turrisellis ex altera, nuncium venerabilis fratris domini Guilielmi de Sonai, Magistri Domus Milicie Templi, ad hanc concordiam faciendam transmissum atque constitutum, ut apparebat per litteras sigillatas dicti Magistri, presentibus et consencientibus fratre Harmanno de Burgo, Preceptore in Campania et Marchia Tarvisana, et fratre Jordano, Preceptora Orane et Sennie: videlicet, quod dictus Magister per se vel nuncios suos pro satisfactione et restitucione dampnorum, que data et illata fuerunt mercatoribus Venetis, Veglensibusque et Arbensibus in civitate Sennie, olim tempore captionis et combustionis ipsius civitatis, dari et solvi faciet hic in Veneciis dicto domino Duci vel eius successori seu nuncio recipienti pro mercatoribus memoratis usque ad summam librarum quinque milium et ducentorum quinquaginta denariorum Venetorum parvorum, dando et solvendo solidos viginti denariorum Venetorum grossorum minus denario uno pro libra computando libra ipsorum grossorum pro libra viginti sex denariorum Venetorum parvorum per tres annos, ita quod tercia pars supra scripte summa pecuniarie persolvatur omni anno in isto festo Beati Petri mensis Junii, et terminus huius solutionis non in isto festo proximo Sancti Petri, sed in alio festo Sancti Petri proxime venturo incipiatur, et in ipso termino tertia pars persolvatur, et sic sub pena dupli huius sume peccuniarie debeat observari in solucione pecunie memorate cum dampnis et expensis restituendis, que fierent inde a domino Duce vel mercatoribus supradictis. Unde dictus dominus Dux nomine suo et Communis Veneciarum, et nomine Comitatus et hominum Vegle, et Comitatus et hominum Arbe, predicto fratri Jacobo recipienti nomine et vice predicti Magistri et Domus Milicie Templi fecit finem et remissionem de omnibus dampnis et iniuriis, que peti possent occcasione damni dati dictis mercatoribus in civitate Sennie, quando capta et combusta fuit tempore fratris Rambaldi de Carono, Magistri Hungarie, currente anno Domini millesimo ducentesimo trigesimo nono, mense Decembri, indictione tercia decima, et ab illo tempore usque ad hodiernum diem, dum tamen observetur a dicto Magistro et Domo Milicie Templi hoc quod in presenti carta concordie continetur. Et e converso prenominatus frater Jacobus nomine et vice prefati Magistri et Domus Milicie Templi fecit finem et remissionem prefato domino Duci et Communi Veneciarum, et universis hominibus Vegle et Arbe, de omnibus dampnis et iniuriis datis seu factis ipsi Domui Milicie Templi, et fratribus eiusdem, a Communi et hominibus Veneciarum, seu a Comitatibus et hominibus Vegle et Arbe usque ad presentem diem, exceptis de dampnis datis per homines Beske fratribus, qui fugiebant a Tartaris ex Monasterio Sancti Gregorii (Georgii), de quibus dictus dominus Dux precipiet per iuramentum Comiti Vegle et Consiliariis, ut cognoscant et ut ius faciant, ita quod si ostendere poterint homines Beske, quod de hiis fuerit satisfactum vel remissum vel facta securitas, id quod factum est, teneatur; et in racione, quam fecerint, dicti Comes Veglensis et Consiliarii eisdem fratribus et Monasterio Sancti Georgii, de hiis maneant contenti. Ad maiorem autem certitudinem et evidentiam pleniorem predicti fratres Jacobus de Turiselis, Harmanus de Burgo, Preceptor Campanie et Marchie Tarvisanes et Jordanus, Preceptor Orane et Sennie, fecerunt presens publicum instrumentum suis sigillis propriis sigillari. Insuper enim prefatus dominus Dux in huius rei testimonium et ad maiorem firmitatem hoc instrumentum fecit suo sigillo plumbeo communiri.

Ego Gabriel Paulinus Notarius et Ducalis aule Veneciarum Cancellarius, predictis interfui et rogatus scripsi, complevi et roboravi.

(Ljubics, Monumenta spectantia historiam Slavorum Meridionalium I. köt. 76. l.)