A B C D E F G

Nicolaus Prepositus Strigoniensis et eiusdem loci Capitulum omnibus, ad quos littere presentes peruenerint, oraciones in Domino. Ad uniuersorum noticiam uolumus peruenire: quod constitutis in presencia nostra Dusnico filio Vetud de uilla Sagisidoud cum suis cognatis, uidelicet Acus, Accincto presbitero, Andrea cum fratribus suis scilicet Deme, Chepano, Stephano, Opsa, Dethmaro, Detrico, Buzad filio Michael, Marcello filio Petri, Micou et Gregorio filijs Mocud ab una parte; Deodato Canonico Sancti Georgij ab altera; proposuit dictus Dusnuc, quod terram ad XXV iugera, cum omnibus suis pertinencijs, que nullo mediante ipsum contingebat, eandem predicto Deodato Canonico uendidisset pro marca et dimidia argenti in perpetuum possidendam. Hac tamen condicione, quod dictus Deodatus suis successoribus dictam terram libere posset relinquere perpetuo possidendam; si uero dictum D. sine heredibus contingeret decedere, cuique uellet, siue Ecclesijs liberam potestatem conferendi haberet; sed alienis uendere non liceret, nisi precium terre, a quo emerat, perciperet ab eodem. De quibus XXV iugeribus terre tria iugera pertinent ad fundum situm iuxta fundum Dusnuc secus riuulum, qui denominatur potok; et aliud fundum prope ecclesiam ad IIII iugera iuxta fundum eiusdem Dusnuc; et XIIII iugera sita inter arbores, uidelicet que wlgo denominantur scilcuz; et duo iugere descendunt per nemora ad uiam, que uenit per predictas arbores scilicet scilcuz; et duo iugera sunt sita secus uallem Blata. Cuius uero terre precium dictus Deodatus eidem uenditori coram nobis persoluit. Postulauerunt igitur tam emptor quam uenditor, ut hoc factum testimonio litterarum nostrarum commendari, et sigilli nostri munimine faceremus roborari; quod et fecimus. Anno Uerbi Incarnati M°CC°XX°V. datum per manus Magistri Benedicti Lectoris Strigoniensis.

(Eredetie bőrhártyán, melyről a pecsétnek töredéke hártyazsinegen függ; a budai kir. kamarai levéltárban.)