In nomine Sancte Trinitatis et Indiuidue Unitatis. Bela Dei gracia Hungarie, Dalmacie, Croacie, Rame, Seruie (Gallicie) Lodomerieque Regis Andree primogenitus et Rex in perpetuum. Cum de beniuolencia ac predestinacione Sumpmi Regis ad hoc simus preordinati, ut singulis in jurisdiccione nostra constitutis simus secundum Apostolum in justicia debitores: propensius et specialius hospites, qui nostrum sibi senserint subsidium profuturum, debita uolumus justicia pretueri. Hinc est, quod nos tam presencium quam futurorum uolumus noticie declarare, quod hospitibus nostris in Perina commorantibus taliter hoc modo concessimus libertatem: Ut per septem annos in nullo nobis teneantur; nec forum, quod ibi celebratur, per septennium tributum persoluat; transactis uero septem annis annuatim centum pensas Regie persoluant Maiestati, uel dextrarium tot pensas ualentem. Tributi autem fori tercia pars Maioris eiusdem Uille spectet jurisdiccioni, quicumque fuerit; residuas autem partes Regie Celsitudini debet amministrare. Nec aliquis ipsos preter defensorem ipsorum a domino Rege statutum audeat iudicare, et si ab ipsorum defensore conquerentibus satisfieri non poterit, ad domini Regis Presenciam dicta causa discutienda transferatur; et si ipsi coram judice quemquam impeterent super aliquo, eis judicetur juramentum. Statuimus eciam,quod si Banus eis ad ualorem unius marce dampnum faceret, in centuplo restitueret eisdem. Item Bano non aliud quam domos suas occasione descensus dare teneantur; pro alijs uero necessarijs precium recepturi. Et si aliquis ipsorum prole caruerit, tam ipso viuente, quam ab hoc seculo transmigrante bona sua cuicunque voluerit conferat retinenda. Et si aliquis de villa super equo (vel) boue calumpniaretur ab aliquo; pro quanto sacramentum facere presumpserit, sibi calumpnians testibus astantibus restituat, et res, pro qua causabatur, ad requirentem deuoluatur. Et si quis villam istam intrare uoluerit moraturus, omnia bona sua, domos suas videlicet, et alia que possederat, omnibus scientibus liberam habeat vendendi facultatem; et recedens de villa ista retineat eadem. Et ligna, que ad vsus suos, uidelicet igni superponenda, uel ad edificandas domos suas expedierint, concessimus possidenda. Et statuimus, quod sacerdotem quemcunque voluerint, in sua recipiant Ecclesia; de decimis ipsorum, prout mos est hospitibus vbicunque manentibus, disponentes. Sane super hec ad vtilitatem ipsorum montem quendam nomine Grachie, et terram, nec non vbicunque intra Zabat vineas plantare voluerint, omni reclamacione postposita assignauimus eisdem. Et ne termini terrarum dubitentur ab aliquo, fecimus annotari. Quarum prima incipit ab oriente, vbi Minor Chemernica transit per viam, gue wlgariter hodut vocatur; et via dirigit illa versus partem meridionalem, vbi meta ipsorum existit; ab inde diuertitur dextrorsum per montem vnum, vbi Minor Petnita cadit in Magnum Petnita, ibi est meta; exinde idem Minor Petnita dirigitur versus occidentem per viam, que ad Cruciferos vadit, ibi est meta assignata; et de via illa descendit versus septemtrionem, vbi ipsa via, et Prichlisnica, et Perna simul veniunt, vbi est eciam meta; Prichlisnica uero ascendit abhinc ad caput ipsius fontis, et ibi est meta; et abinde progreditur iuxta semitam dextrorsum, et uadit ad caput aque Jelesnicha vocatum, (így) et ibi meta sita est; aqua uero nominata confluit abinde iuxta uillam Drascu, et uadit in uiam, que venit de foro Regio, et ibi est meta; et uia illa ascendit ad orientem iuxta prenominatum Minorem Chemernicha, et ibi contignatur mete priori. Et vt hoc firmum et stabile permaneat, nec per alicuius machinacionem in irritum ualeat retractari, sigilli nostri caractere fecimus roborari. Pristaldis uero Petro Comite Pilisiensi, et Mirizlao de Goricha terrigena existentibus. Datum per mauus Mathie Prepositi Zagrabiensis tunc temporis aule nostre Cancellarij, anno Gracie millesimo CC°XX° quinto. Venerabilibus Vgrino Colocensi, Gunzulino Spalatensi Archiepiscopis existentibus; Stephano Zagrabiensi, Martino Corbauiensi, Micus Pyzeciensi Episcopis existentibus. Chak Budrugiensem, Poth Bachiensem, Buzad Ferrei Castri, Gecha Zaladiensem, Mykka Symigiensem Comitatus gubernantibus; Paulo Thauarnicorum, Andrea Dapiferorum, Bogondo Pincernarum, Johanne Agasonum Magistratus regentibus.
(Eredetie bőrhártyán, vörös-barna selyemzsinóron függő pecsét alatt; a zágrábi országos levéltárban a budai kir. kamarai levéltárnak ott letéteményezett okmányai közt.)