076. II. Endre királynak a Gorre megye feletti törvényhatóságot tárgyazó adománya a topuskai apát és monostor számára.. 1213. körül.

Andreas Dei gracia Hungarie Rex etc. omnibus presens scriptum inspecturis salutem in eo, qui est salus omnium. Licet inter cetera virtutum opera largiendi beneficium a plerisque semper commendetur; ibi tamen memoria precipue commendatur, ubi pro salute ipsius largientis, beneficii receptores Divinam misericordiam die noctuque inemoriter deprecantur. Hac itaque racione salubriter premoniti, Domui Toplice de Gorra, nostre videlicet prime devocionis plantacioni, concedimus et volumus, ut Comitatus Gorre cum universis suis pertinenciis et populis in eo commorantibus, preter sex generaciones, ita serviant et ea consvetudine, qua nos iam dudum Regie Maiestatis libertate cum privilegio nostro confirmantes in perpetuum concessimus serviendum. Quapropter hanc nostre donaciones stabilitatem presencium posterorumque noticie significantes, firmiter damus in mandato nostro fideli Bano, videlicet nunc existenti et omnibus quicumque loco vel tempore aliquo post ipsum fuerint constituendi, quatenus Abbatem et Monachos Sancte Marie in Toplica de Gorra et populum sibi subiectum, nec pro descensu contra voluntatem Abbatis in populo Ecclesie exigendo, nec pro gravamine alicuius exactionis inquirendo deinceps inquietare presumatis sive molestare, sed eo iure et libertate, qua nos per privilegium nostrum eis concessimus, pacifice ipsos possidere permittatis. Preterea universis populis et iobagionibus castrensibus ad prefatam Ecclesiam spectantibus mandamus et firmiter precipimus, quatenus omni remota erroris caligine fideliter et debito more sepedicte Ecclesie Abbati et fratribus suis servire studeatis in omnibus, sicut decet dominis vestris.

(Tkalcsics, Monum. hist. Episc. Zagrabiensis I. köt. 33. l.)