053. Endre herczeg Kaian helységnek határait szabályozza Baran zágrábi dékán számára. 1202.

In nomine Sancte Trinitatis et Individue Unitatis. Andreas Dei gracia Dalmacie, Chrowacie, Chulmeque Dux in perpetuum. Quoniam in rerum temporalium mutabili varietate nichil adeo perpetuitati creditur conforme, quam quod virorum memoria dignorum inviolabili permanere statu permittantur ordinaciones, et ne pravorum pateant incursibus pia proteccionis manu per successores conserventur. Quod nos quoqae considerantes terram Kaianj castrensis, quam pie recordacionis pater noster illustrissimus Rex Hungarorum Bela Barano Zagrabiensi Decano perpetuo possidendam contulerat, assignans eam per hominem suum nomine Woychua, eidem confirmavimus resignantes per hominem nostrum nomine Stephanum. Dicta autem terra his metis circumcingitur: ab oriente confinis est terre Abraam, cognati Gurconis Comitis; deinde protenditur contra meridiem ad magnam pirum, confinisque est terre servorum Regis; hincque vergit contra occidentem super fontem lapideum iungens se terre castrensium, ac deinde versus semptemtrionem et iuxta castrum Nicola annectitur publice strate Zagoriensis, disiungens se a didis castrensium terris revertensque ad inicium mete. Verum ne processu temporis huius nostri a labili hominum oblitteritur memoria facti series scripto commendari iussimus, et ut firmius robur optineat sigilli nostri impressione comunivimus. Sunt autem huius rei testes: Mogy Comes, Nicolaus Comes, Martinus Banus, Crasun Comes, Cresen Comes, Ata Comes. Datum per manus Jacobi prepositi Magistri nostri et Cancellarii. Anno Dominice Incarnacionis MCCII.

(Tkalcsics, Monum. hist. Episc. Zagrab. I. köt. 16. l.)