047. Imre király megerősíti Chazma birtokát a zágrábi egyház számára. 1200.

In nomine Sancte Trinitatis et Individue Unitatis. Hemericus dei gracia Ungarie, Dalmacie, Croacie Rameque Rex in perpetuum. Inter cetera virtutum exercitia hoc nobis ad proventum superne remuneracionis conferre dinoscitur, quo Ecclesiarum Dei iura diligenter protegimus, et a calumpniancium inportunitatibus provida dispensacione salubriter expedimus. Huius itaque rei speculacione terram quandam nomine Chasmam, quam gloriosissimus progenitor noster Rex Ladizlaus Ecclesie Zagrabiensi contulit, per clericum nostrum Thomam, Canonicum Albensem, fideliter peragrari facientes presentis scripti auctoritate eidem Ecclesie inrefragabiliter confirmamus, et populum in ea constitutum ad instar Dumbrogensium et aliorum Ecclesie, de qua loquimur, subditorum in marturinarum et annone pensione sive hospicii debito non Bano, sed soli Episcopo respondere decernimus. Supramemorate vero terre meta prima est pons Regis Colomani, secus quem nomen Episcopi Prodani in corticibus arborum insculptum est. Hinc via dicti Regis dirigitur super magnum montem usque ad puteum eiusdem, a puteo autem ad Rosuk, de quo ad montem Sythua, inde ad fluvium Dobouk, deinde ad Belablata, hinc ad fluvium Prestika, qui currens iungitur prenominato fluvio Chasman. In villa vero Zelina prima meta est versus septemtrionem iuxta puteum, a quo protenditur in medio vallis usque magnam viam dividentem terram Bereslai et tendit ad ecclesiam sancti Johannis, de qua ad arborem cruce signatam dividentem terram Vgrini, hinc reflectitur versus occasum ad pontem Wratuslai de Lomni, sub quo ponte currit fluvius Zelina, hinc protenditur ad magnum montem usque metam Razumeni, inde ad supra memoratum puteum terminatur. Ut igitur istarum rerum veritas indissolubili stabilitate duret in posterum, presentem paginam sigilli nostri titulo roboravimus. Datum per manus Desiderii, Aule Regie Cancellarii et Prepositi de Scibin, anno Dominice Incarnacionis MCC. Venerabili Job Strigoniensi Archiepiscopo existente, Reverendo Saul Colocensi Archiepiscopo, Calano Quinqueecclesiensi Episcopo, Ugrino Geurensi Episcopo, Dominico Zagrabiensi Episcopo. Mika Pallatino et Bachiensi Comite, Benedicto Bano et Comite de Zala, Legforo Voyvoda, Weyteh Curiali et Nitriensi Comite, Theodoro Comite de Budrig, Cepano Comite de Suprun.

(Tkalcsics, Monumenta hist. Episcopatus Zagrabiensis I. köt. 9. lap.)