Andreas Dei gracia Hungarie, Dalmacie, Croacie, Rame, Seruie, Gallicie, Lodomerie, Cumanie Bulgarieque Rex omnibus Christi fidelibus presentem paginam intuentibus salutem in omnium saluatore. Equitas suadet, ius requirit, ut quodcunque ex legitimis racionibus traditur, id solidum perpetuo debeat permanere. Proiade ad vniuersorum noticiam tenore presencium, harum serie (így) uolumus peruenire; quod religiosi viri Herricus et Conradus, fratres Ordinis Cysterciensis Ecclesie Sancte Crucis de Austria, vice et nomine fratris B. Abbatis et tocius Conuentus eiusdem Ecclesie, cum litteris procuratorijs eorundem sufficienter instructi, coram nobis comparentes confessi sunt, quandam possessionem Monasterij Sancte Crucis, Turdaskeddi uocatam, in Comitatu Nitriensi existentem, cum omnibus utilitatibus suis et pertinencijs vniuersis se dedisse, tradidisse et contulisse venerabili patri Lodomerio Dei gracia Archiepiscopo Strigoniensi, eiusdemque loci Comiti perpetuo, dilecto et fideli nostro, et per eum Archiepiscopatui Strigoniensi, in concambium seu permutacionis contractum cuiusdem possessionis ipsius venerabilis patris, Parachan uocate in Comitatu Posoniensi existentis, que eisdem fratribus magis utilis uidebatur, perpetuo et irreuocabiliter possidendam. Cui contractui siue concambio, tamquam Regni Dominus et Patronus Ecclesie, nostrum Regium prebuimus consensum et assensum. In cuius rei memoriam, perpetuamque firmitatem ad peticionem parcium presentes concessimus litteras, dupplicis sigilli nostri munimine roboratas. Datum per manus venerabilis patris Theodorij Dei gracia Episcopi Jauriensis, aule nostre Vicecancellarij dilecti et fidelis nostri, anno Domini M°CC° nonagesimo septimo, tercio idus Junij, Regni autem nostri anno septimo.

(Az eredeti után Knauz Nándor, Magyar Sion III. köt. 944. 1. Lásd alább 186. sz. a.)