Vniuersis Christi fidelibus presentes litteras inspecturis Capitulum Ecclesie Posoniensis salutem in Domino. Ad vniuersorum noticiam tenore presencium volumus peruenire, quod constitutis personaliter coram nobis nobili viro Cozma Comite filio Comitis Cozme de Bozyn, et quodam iuuene Gon nomine officiali Comitis Pauli fratris predicti Cozme pro eodem Paulo domino suo ab una parte, et Ladizlao filio Stephani seruiente eiusdem Comitis Cozme ab altera; idem Cozmas est confessus viua uoce, quod prefatus Ladizlaus seruiens suus sibi a multis temporibus anteactis fidelia seruicia et meritoria obsequia, diuersis casibus fortune exponendo se, temporibus et locis oportunis semper et indefesse inpendisset; et maxime ipsum Cozmam Comitem dominum suum a periculo, et pena mortis prompta et ordinata per Eberhardum tunc Comitem Posoniensem, suo auxilio et fidei consilio libarasset. Pro quo facto idem Ladizlaus ablatis omnibus bonis suis proprijs et populorum suorum in uilla sua circa Humoro existencium, maximum dampnum et proscripcionem, ac graues inuirias subportasset. Pro quibus tot et tantis seruicijs fidelibus et admodum oportunis eidem Ladizlao recompensacionem facere cupiens aliqualem, licet exiguam et modicam; tamen ad presens quandam possessionem suam hereditariam ad suam propriam porcionem pertinentem, videlicet dimidietatem possessionis Phatista uocate in Chollocuz existentis, cum omnibus utilitatibus suis, scilicet terris arabilibus et non arabilibus, pratis, fenetis, pascuis pecorum, aquis et piscinis, ac suis pertinencijs vniuersis, cum bona voluntate Comitis Pauli karissimi fratris sui consencientis et permittentis, liberaliter et libenter, sicut eciam hoc nobis predictus Gon ex parte domini sui predicti Pauli Comitis retulit personaliter coram nobis comparendo, donasset, dedisset et tradidisset eidem Ladizlao, et per eum suis heredibus heredumque suorum successoribus perpetuo et irreuocabiliter possidendam: obligando se, quod quicunque processu temporum ipsum Ladizlaum aut suam posteritatem pro prenotata possessione attemptauerit inpetere vel vexare; extunc idem Comes Cozmas tenebitur expedire proprijs laboribus et expensis. In cuius rei memoriam ad peticionem utriusque partis presentes nostras concessimus litteras sigilli nostri munimine roboratas. Datum anno Domini M°CC° nonagesimo primo, quinta feria proxima ante dominicam Esto Michi.

A B C D

(Eredetie bőrhártyán, melyről a pecsét megyszinű-sárga selyemzsinóron függ; a budai kir. kamarai levéltárban.)