Nos Capitulum Albensis Ecclesie damus pro memoria, quod Ponic Bano Comite Zaladiensi ab una parte; Nycolao filio Arnoldi, Arnoldo fratre suo, Ponich Comite, Chak Magistro, Oguz filio Buzad fratribus suis ex altera coram nobis personaliter constitutis; idem Ponich Banus assumpsit et obligauit; ut duo castra Plyske et Parpah uocata cum suis pertinencijs, et quandam possessionem Nykch uocatam, tum propter bonum consanguineitatatis ipsius Nycolai et cognatorum suorum nobilium predictorum, tum eciam pro remedio anime domini sui St. Illustris Regis Vngarie clare memorie, ex cuius collacione eadem castra et possessio deuenerant ad ipsum Ponic Banum, restitueret et redderet ad manus dicti Nycolai pleno iure sub testimonio Capituli Wesprimiensis; et ad maiorem cautelam idem Ponic Banus, ut obligacioni huiusmodi per ipsum coram nobis facte non possit aliquatenus contraire, manifestum in ecclesia Beate Virginis super altare Sancte Crucis prestitit sacramentum; et e conuerso idem Nycolaus pro expensa et sumptibus non modicis, quos dictus Ponic Banus in tenendis illis castris tempore guerrarum in conflictu Regis Bohemie fecit et habuit pro utilitate castrorum eorundem, dedit et donauit seruos (et) ancillas cum filijs et filiabus ac uxoribus suis eidem Ponich Bano et suis successoribus. Quos idem Ponich Banus seruos et ancillas traduci ad se fecerat de predicta possessione Nycolai perpetuo et irreuocabiliter possidendos. Nomina seruorum eorundem, quos nominare coram nobis potuerunt, hec sunt: Zalawa cum fratre suo Zulaw, Michael cocus, Malchun, Cheke, Paul, Martinus, Durguzlo, Thomas carpentarius, Zunda, Doboya, Cheghe, Wolk cum filijs, filiabus et uxoribus. Ad hec idem Nycolaus assumpsit super fidem suam, quod nouem capita seruorum; Burtuam cum duobus filijs suis, Zurk cum duobus fratribus Gurk et Beden uocatis, filius Thome carpentarij, Thomas filiolus Petri, et filius coci Michaelis uocatorum, qui ab ipso Ponich Bano aufugerant, ubicunque idem Nycolaus reinuenire poterit, in die Exaltacionis Sancte Crucis seu restitucionis castrorum memoratorum restituet Ponich Bano sub testimonio Capituli prememorati. Sed si reinuenire non posset, extunc dabit pro eisdem nouem capitibus seruorum duas mansiones libertinorum cum filij suis, videlicet Gregorium et Gurk; et si ijdem duo libertini cum filijs complere numerum nouem capitum suorum non possent, extunc complebit idem Nycolaus in pecunia, dando pro quolibet capite tres marcas in bono argento, ita tamen quod pro vno seruo tres libertini recipientur ex prenotatis; eodem die eciam idem Nycolaus iurabit, quod de predictis nouem capitibus seruorum nullum apud se haberet, nec celare ullum contra ipsum Ponic Banum quicquam ex eisdem; et quicunque de cetero de predictis seruis uel libertinis ab ipso Ponich Bano siue clam, siue palam ad eundem Nycolaum reuerteretur, extunc semper ad fidem suam restituere tenebitur eidem Ponich Bano, et ab omnibus impetitoribus eosdem aput ipsum Ponich Banum defensare. Super quo eciam, ne huiusmodi obligacionis series per ipsum Nycolaum facte contra prefatum Ponic Banum aliquatenus infringi valeant, prenotati nobiles viri ipsi Nycolao astantes prestiterunt iuramentum. Ceterum idem Nycolaus in festo annotato assumpsit se daturum eidem Ponic Bano de uino anni presentis decem tunellas vini cum tunellis, curribus et quadraginta bonis bobus, quarum quelibet tunellarum continere debet centum cubulos vini. Hoc adiecto, quod si qua parcium de premissis omnibus vel singulis premissorum resiliret, vniuersas possessiones suas hereditarias et empticias amittet, pars utraque se ad id coram nobis obligauit spontanea uoluntate. Datum in quindena Sancti Regis anno Domini MşCCş septuagesimo secundo.
(Ugyan a székesfehérvári káptalannak 1274-ki átiratából, mint alább; a főmélt. herczeg Batthyáni család levéltárában.)