Gregorius Prepositus et Capitulum Ecclesie Strigoniensis vniuersis Christi fidelibus presentes litteras inspecturis salutem in Domino sempiternam. Ad vniuersorum noticiam tenore presencium uolumus peruenire, quod Levas Comes de Sarov, officialis domini Philippi venerabilis in Christo patris Strigoniensis Ecclesie Archiepiscopi, aule Regie Cancellarij domini nostri ex una parte, item Comes Budov filius Alexandri ex alia, coram nobis personaliter constituti, ydem Levas confessus est oraculo viue uocis in hunc modum, quod quandam terram suam empticiam Keer uocatam prope Hugog existentem ad quatuor aratra sufficientem, quam a Cegle filio Bogdan emerat, prefato Comiti Budov proximo suo pro decem marcis argenti confessus est perpetuo vendidisse; et ipsam sumpmam pecunie confessus est ab eodem Comite Budov plenarie recepisse. Huic eciam contractui venerabilis in Christo pater dominus Philippus Strigoniensis Ecclesie Archiepiscopus, dominus et Prelatus noster, in medio nostri personaliter comparendo, consensum prebuit et assensum eo modo, quod idem Comes Budou de ipsa terra domino Archiepiscopo Strigoniensi in perpetuum semper et vbique more aliorum nobilium iobagionum memorate Ecclesie seruire teneatur; quod si facere non curaret uel non posset, extunc pro eadem quantitate pecunie domino Archiepiscopo, uel iobagionibus dicte Ecclesie ipsam terram reddere teneatur. In cuius rei memoriam perpetuamque firmitatem presentes concessimus litteras pendentis sigilli nostri munimine roboratas. Datum anno Domini M°CC°LXX° primo.

(Eredetie bőrhártyán a káptalannak vörös selyemzsinóron függő pecsétje alatt, a budai kir. kamarai levéltárban.)