Stephanus Dei gracia Hungarie, Dalmacie, Croacie, Rame, Seruie, Gallicie, Lodomerie, Cumanie Bulgarieque Rex omnibus Christi fidelibus presentes litteras inspecturis salutem in salutis largitore. Ad vniuersorum noticiam harum serie volumus peruenire, quod cum nos cuperstite adhuc karissimo patre nostro Bela Rege inclite recordacionis Ducatum Transsiluanum teneremus, et graues persecuciones eiusdem karissimi patris nostri, licet inmerito, perpessi fuissemus; Nycolaus Judex Curie nostre, Comes Symigiensis, dilectus et fidelis noster, qui tunc temporis aput eundem karissimum patrem nostrum Comes Syrmiensis fuerat, se ad nos de ipso Comitatu suo cum honestissima familia transtulit, in ipso nostre persecucionis tempore pro fidelitatibus et seruicijs nobis exhibendis et pariter obseruandis, amissionem seu destruccionem possessionum vltra Drawam et ex ista parte Drawe existencium, ac vniuersorum bonorum suorum distraccionem minime expauesscens, quibus omnibus demum per eundem karissimum patrem nostrum fuerat spoliatus; qui quidem Nycolaus Comes tunc eciam nobis multa et diuersa fidelitatis opera, et postmodum in alijs pluribus expedicionibus nostris multis et laudabilibus seruiciorum meritis coram nostre Maiestatis occulis tanquam miles strenuus claruit et refulsit; qui licet post tot fidelitates et seruiciorum merita maiora et ampliora de Magnificencia Regia in perpetuitatibus seu donacionibus perpetuis promereri debuisset; in reconpesacionem tamen seruiciorum suorum aliqualem, quasdam possessiones, videlicet Furro iuxta aquam Herrad, Inanch, cum villis ad easdem spectantibus, Hewes similiter cum uillis ad ipsam pertinentibus, ac possessionem Elsua, simul cum castro Muran, quaslibet ipsarum cum omnibus petrinencijs, appendicijs, circumstancijs et utilitatibus suis vniuersis, contulimus, dedimus et donauimus eidem Comiti Nycolao, et suis heredibus, heredumque suorum successoribus perpetuo et inreuocabiliter possidendas. Vt igitur huius nostre donacionis seu collacionis series robus obtineat perpetue firmitatis, presentes eidem Comiti Nycolao dedimus litteras diplicis sigilli nostri munimine roboratas. Datum per manus Magistri Benedicti Prepositi Orodiensis, aule nostre Vice-Cancellarij, dilecti et fidelis nostri, anno Domini M°CC° septuagesimo primo, quinto ydus Maij, Regni autem nostri anno primo.

(Eredetie bőrhártyán, melyről a király kettős pecsétjének töredéke zöld-sárga selyemzsinóron függ, a budai kir. kamarai levéltárban.)