(C)apitulum Ecclesie Albensis omnibus Christi fidelibus presentes litteras inspecturis, salutem in Domino sempiternam. Ad uniuersorum noticiam tenore presencium uolumus pervenire, quod Dominico Comite de Barana filio Petri Comitis de genere Chak ab una parte; Magistro Walentino Cantore Strigoniensi, procuratore venerabilis patris Philppi Strigoniensis Archiepiscopi, Aule Regis Cancellarij, ex altera in nostra presencia constitutis; prefatus Dominicus Comes de Barana confessus est, se vendidisse quandam terram suam nomine Boroch, in Comitatu Nitriensi situatam, prope Nouum Naswod curtem archiepiscopalem, prefato venerabili patri Archiepiscopatus nomine ementi, pro quadraginta marcis communis argenti, cum pratis, piscaturis, insulis, et alijs pertinencijs ac vtilitatibus, sub eisdem metis et terminis, sub quibus idem ipsam terram habuit, tenuit et possedit; quas quadraginta marcas communis argenti, precium conuentum predicte terre, Magister Walentinus Cantor Strigoniensis, procuratorio nomine Strigoniensis Archiepiscopi prefato Comiti Dominico in conspectu nostro dedit, soluit, numerauit et assignauit; qui Comes Dominicus nichilominus protestatus et confessus est, recepisse et penes se habere totum precium vendite ab eo terre, et sibi plenitus (így) satisfactum, et ipsam terram cum pleno (dom)inio coram nobis exnunc Magistro Walentino Cantori, uice et nomine Archiepiscopatus, et Archiepiscopi nomine assignauit. In cuius rei testimonium et robur perpetuum, presente, volente et petente ipso Comite Dominico, sepefato Cantori, procuratorio Archiepiscopatus et Archiepiscopi nomine, presentes nostras litteras dedimus et concessimus, et eis sigillum nostrum autenticum apponi fecimus et appendi. Datum anno Domini M°CC°LX° nono, pridie kalendas Julij. Magistro Demetrio Ecclesie nostre Preposito, aule R(egie Vice)-Cancellario, Myke Cantore, Feliciano Custode, Micaele Decano existentibus.

(Az eredeti után Knauz Nándor, Magyar Sion III. köt. 58. l.)