161. István ifjabb királynak Ratka nevű földet tárgyazó adománya, Gyogi Endre comes számára. 1269.

(S)tephanus Dei gracia junior Rex Hungarie, Dux Transsiluanus, Dominus Cumanorum omnibus Christi fidelibus presens scriptum cernentibus salutem in eo, qui est salus omnium. (L)icet Regia pietas manum munificam porrigere debeat vniuersis; illos tamen, quorum experta probitas laudata est in prosperis et in aduersis, principaliori debet prosequi munere et fauore, ut alii eorum exemplis inuitati ad fidelitatis opera forcius accendantur. (H)inc est, quod ad vniuersorum tam presencium quam posterorum noticiam harum serie volumus peruenire, quod attendentes fidelitates et seruicia Comitis Andree de Gyog dilecti et fidelis nostri, que idem nobis et Regno nostro a temporibus puericie eiusdem in diuersis et necessarijs casibus fortune se laudabiliter et intrepide exponendo fideliter exhibuit et deuote; et specialiter que seruicia laude digna tempore persequucionis nostre et miserie, omnibus bonis suis post tergum derelictis adherendo nobis et intrando nobiscum claustra castri Feketeuholm, et in alijs plurimis articulis coram nobis et omnibus Barronibus nostris gratum et acceptum inpendisset obsequium, que ad presens enarrari sufficienter nequeunt suo modo. In recompensacionem seruiciorum eius volentes grata uicissitudine occurrere, licet pocioribus dignus habeatur respectu eius, que (így) ad presens eidem duximus ordinandum; terram Elye et Pouse sine herede decedencium Ratka vocatam dedimus, donauimus seu contulimus dicto Comiti Andree, et per eum suis heredibus heredumue successoribus iure perpetuo et irreuocabiliter possidendam sub hijsdem metis et terminis, quibus in antea ipsa terra per priores possessores suos limitata fuerat et possessa. (V)t igitur hec nostra donacio seu collacio robur optineat perpetue firmitatis, nec tractu temporum per quempiam possit uel debeat in irritum reuocari seu retractari; presentes concessimus litteras duplicis sigilli nostri munimine roboratas. (D)atum per manus Magistri Petri, aule nostre Vice-Cancellarij dilecti et fidelis nostri anno Domini M°CC° sexagesimo nono.

(Eredetie bőrhártyán, melyről a pecsétnek töredéke vörös selyemzsinóron függ, a budai kir. kamarai levéltárban.)