Bela Dei gracia Hungarie, Dalmacie, Croacie, Rame, Seruie, Gallicie, Lodomerie, Cumanieque Rex omnibus presentes litteras inspecturis salutem in omnium saluatore. Ad vniuersorum noticiam harum serie volumus peruenire, quod Alexander filius Marcelli de villa Mortun fidelis noster ad nostram accedens presenciam nobis exposuit humiliter supplicando, quod cum olym post insultum gentis Tartarice in continenti terram suam hereditariam Mortum vocatam, existentem in Comitati Posoniensi prope Morauiam iuxta Ztumpa, abstulissemus, vt dicebat, et eiusdem terre vsu modici temporis spacio caruisset, et eandem recuperasset de iusticia et de plenitudine nostre gracie speciali, et in eiusdem terre possessione pacifica et tranquilla esset a spacio viginti annorum transactorum, et vltra pecijt, vt super hoc nostrum sibi priuilegium concedese dignaremur. Verum cum nostre sit intencionis, vnicuique reddere, quod suum est; ad peticionem eiusdem Alexandri filij Marcelli condescendentes, super iam dicta terra Mortun, vt eandem sub eisdem metis et terminis, quibus in antea possederat, pleno jure valeat possidere pacifice et quiete, presentes eidem Alexandro litteras dupplicis sigilli nostri robore communitas duximus concedendas. Datum per manus Magistri Demetrij Albensis Ecclesie Prepositi, aule nostre Vice-Cancellarij, dilecti et fidelis nostri anno Domini M°CC° sexagesimo nono, Regni autem nostri anno tricesimo quarto.

(Robert Károly királynak 1326-ki megerősítő priuilegiumából, a budai kir. kamarai levéltárban.)