A B C D

Gregorius Prepositus et Capitulum Ecclesie Strigoniensis omnibus Christi fidelibus presentes litteras inspecturis salutem in Domino. Ad uniuersorum noticiam tenore presencium volumus peruenire, quod cum domina Maria Illustris Regina Vngarie nobis per suas litteras precepisset, ut unum ex nobis cum Comite Rubyno Villico Strigoniensi, homine suo, mittere deberemus, cuius testimonio idem Comes Rubynus terram ipsius domine Regine Nyr uocatam, quam Mortunus et Georgio interpretibus Kelduchyni Cumani eadem domina Regina in prefatis suis litteris se contulisse scribebat, perambularet et statueret hominibus memoratis; nos iuxta ipsius domine Regine mandatum vnum ex nobis, uirum ydoneum et discretum, videlicet Wytkam presbiterum Ecclesie nostre Decanum ad terram misimus antedictam. Qui demum rediens, nobis retulit, quod cum dictus Comes Rubynus ad ipsam terram accedens, eandem per metas suas ueteres, uocatis et presentibus hominibus Reginalibus supra eadem terra Nyr residentibus, perambularet et circuiret, et prefatis Mortunus et Georgio assignare intenderet; Petrus, filius Johannis de Nyr, ciuis Strigoniensis, in ipsa terra comparens, presentibus prefatis hominibus Reginalibus de Nyr, et nominatim ex eisdem Georgio, Palen, Syka, Leguen, et Petro filio Buhte, ac alijs ipsius terre vicinis et commetaneis, terram hereditariam, ad usum trium aratrorum sufficientem, non cum metis separatam, sed mixtim adiacentem, distinctam cum herbis, in eadem terra Nyr dixerit se habere. Et tam dicti populi Reginales, quam eciam alij commetanei eundem Petrum in ipsa terra Nyr affirmauerunt et confessi fuerunt, habere terram quantitatis memorate. Predicti eciam Mortunus et Georgius, quibus ipsa terre Reginalis assignata exstitit, terram prefati Petri, in eadem mixtim adiacentem, ut premisimus, cum feneto et alijs utilitatibus, ac pertinencijs suis, reliquerint et demiserint eidem Petro pacifice sine aliqua inquietudine possidendam. In cuius rei testimonium et memoriam presentes nostras concessimus litteras, sigilli nostri munimine roboratas. Datum per manus Magistri Sixti Scolastici Strigoniensis, anno Domini M°CC°LX° octauo.

(Az eredeti után Knauz Nándor, Magyar Sion III. köt. 56. l.)