143. István kalocsa-bácsi érseknek szabadságlevele a Rymavölgyi aranybányászok számára. 1268.

Stephanus miseracione Diuina Sanctarum Colochensis et Bachiensis Ecclesiarum Archiepiscopus vniuersis presentes litteras inspecturis salutem in Domino. Vniuersorum noticie declaramus, quod nos hospitibus nostris de aurifodio de Rymua congregatis et congregandis hanc concessimus libertatem: Vt inter se eligendi maiorem ville, quem uoluerint, habeant plenam et liberam facultatem, qui omnes causas ipsorum, tam maiores quam minores, tam criminales quam ciuiles, examinandi et dirimendi habeat potestatem; et quod Curialis Comes noster de ipsorum causis cognoscendis intromittere se non possit, nisi in eo casu, cum maior dicte ville cum suis conciuibus ad cognoscendum de aliqua causa ardua, que emerserit, sifficere se uiderit non posse. Item sacerdotem, quem uoluerint, et iuxta suum ydioma, honestum ac omni excepcione maiorem inuenerint, ius habeant ad suam Ecclesiam presentandi. Item si aliquem inter ipsos non habentem domum, omicidium vel aliquod aliud malum pertractare contigerit, et si auffugerit, nec hospes suus, nec sui cognati debebunt in iudicium euocari, seu ob hoc condempnari. Item quod nec per hominem nostrum, nec per simplex sigillum sine litteris citari valeant ab aliquo, nisi per litteras nostras speciales. Ad hoc eisdem concedimus et fauorabiliter indulgemus, quod eorum quilibet aratrum habens integrum, annis singulis nobis soluere tenebitur vnam vnciam, medium autem aratrum habens tria pondera, illi vero, qui terram non arant, duo pondera de qualibet soluant mansione; solucio autem memorati terragij eo modo et eo tempore fiet, quo alij popouli nostri in Comitatu de Rymua existentes, soluere consueuerunt; ita tamen, quod villicus et maiores duodecim de eisdem inter se dictum terragium exigant, et sic persoluant nostro collectori, qui pro tempore fuerit constitutus. Item custodes siluarum nostrarum ad peticionem ipsorum hospitum de ipsa villa transferentes, terram eorum dictis hospitibus duximus conferendam. Concessimus eciam eisdem, vt eundi nobiscum ad exercitum necessitate per nos nullatenus constringantur. In cuius rei memoriam pleniorem et inuiolabilem firmitatem ad peticionem predictorum hospitum nostrorum instanciam presentes concessimus litteras sigilli nostri munimine roboratas. Datum in Zumbothel anno Domini M°CC°LX° octauo tercio kalendas Marcij.

(János kalocsai érseknek 1278-ki megerősítő okmányából, a budai kir. kamarai levéltárban.)