Stephanus Dei gracia junior Rex Hungarie, Dux Transsiluanus, Dominus Comanorum omnibus Christi fidelibus presentem paginam inspecturis salutem in omnium saluatore. Cum ab exordio rerum humane condicionis libertatis omnium vna eademque fuerit condicio, Diuina permittat pietas, et id ipsum Regia annuere debet benignitas, ut pro quibus propria vel aliorum merita suffragantur, ad pristinum libertatis statum restituendi fore censeantur. Proinde ad uniuersorum noticiam tam presencium quam posterorum harum serie volumus peruenire, quod consideratis fidelitatibus et seruiciorum meritis Petri Comitis filij Elye fidelis nostri, ad instanciam et peticionem eiusdem Poukam et Barnabum jobagiones Castri nostri de Gumur, filios Sudurman, seruientes videlicet ipsius Petri Comitis fili Elie, et propter fidelitates ac seruicia dictorum Pouka et Barnabe, que et quas ijdem in multis articulis ac diuersis nobis et Regno nostro necessarijs, varijs casibus fortune se exponentes fideliter exhybuerunt, laudabiliter et indefesse, et specialiter tempore persecucionis nostre et miserie, quando videlicet dura et crudelis, et iniusta persecucio parentum nostrorum de Regno nostro extra terminos Regni nostri ad castrum Fekethewhalom fugando intrare coarctauit, tandem post exitum ipsius castri Laurencio aduersario nostro capitali capto et conuincto ijdem Pouka et Barnabas, vnacum domino ipsorum, Petro Comite videlicet filio Elie, ante omnes alios nobis occurrerunt ad omne mandatum et preceptum nostrum se sine intermissione submittentes, donec ad pacis cum parentibus nostris deuenissemus vnionem. Ceterum cum secundo inter nos et parentes nostros materia questionis fuisset suscitata, et eosdem Poukam et Barnabam ad castrum dicti Petri Comitis domini ipsorum transmisissemus, ipsum castrum, sicut de ipsorum laudabili fidelitate sperabamus, nobis reseruarunt. Nos autem in recompensacionem seruiciorum eorundem, volentes eisdem grata vicissitudine occurrere, eosdem Poukam et Barnabam, et per ipsos suos heredes heredumue successores eorundem, a jobagionatu Castri de Gumur supradicti cum terra sua Kozorossou vocata in Comitatu Neugradiensi adiacenti pure et simpliciter eximendo, in numerum seruiencium nostrorum nobilium duximus transferendos; super qua eciam libertate ijdem privilegium Herricy Regis karissimy predecessoris nostri felicis recordacionis Sudurman patrem suum antedictum obtinuisse asserebant, quod tempore Tartarorum amisisse per eundem affirmarunt. Vt igitur hec per nos eis concessa libertas, et a predecessore nostro prius habita et optenta, robor optineat perpetue firmitatis, nec tractu temporis per quempiam successorum nostrorum possit uel debeat reuocari atque irritari, presentes eisdem concessimus litterras duplicis sigilli nostri munimine roboratas. Datum per manus Magistri Petri dilecti et fidelis nostri aule nostre Vice-Cancellarij anno Domini M°CC°LX° octauo.

(Az egri káptalannak 1340-ki átiratából, melyet „Dominicus filius Dominici de Kodrozou pro se et pro Blasio filio Abulgan de eadem” kért, a budai kir. kamarai levéltárban.)