Clemens Espiscopus seruus seruorum Dei dilecto filio... Primicerio Sancti Marchi de Venetiis, salutem et Apostolicam benedictionem. Dilecti filii Bonaventura Bernadini et Jacobus Aldebrandini, ciues et mercatores Senenses in nostra proposuerunt presentia constituti, quod cum ipsi pro se ipsis, necnon pro Orlando Bonsignoris, Jacobo Ranuccini, Dietaviva Bonelli, et aliis eorum sociis, cinibus et mercatoribus Senensibus, venerabili fratri nostro... Zagrabiensi Episcopo, tunc apud Sedem Apostolicam personaliter constituto renuncianti constitutioni de duabus dietis edite in Concilio Generali, beneficio restitutionis in integrum, et omnibus litteris Apostolicis impetratis ac etiam impetrandis; quingentas et sexaginta et quatuor marchas sterlingorum nouorum diuersis uicibus mutuarint, eis certis loco et terminis persoluendas, prout in instrumentis publicis et litteris inde confectis plenius continetur; idem Episcopus eis de dictis marchis, quamquam termini solutionum effluxerint, hactenus satisfacere non curavit, contra iuramentum proprium, super soluenda quadam ex predictis marchis quantitate specialiter prestitum, veniendo, propter quod iidem mercatores dampna grauia et expensas non modicas se asserunt incurisse. Nos igitur mercatoribus eisdem Apostolico super hoc volentes adesse fauore, discretioni tue per Apostolica scripta mandamus, quatenus eundem Episcopum per te vel per alium ex parte nostra moneas efficaciter et inducas, ut prefatis mercatoribus, vel eorum procuratoribus suo nomine, de iam dictis quingentis et sexaginta et quatuor marchis, cum iustis et moderatis expensis, ac debita restauratione dampnorum; iuxta tenores litterarum et instrumentorum eorundem infra duos menses post monitionem huiusmodi, usuris omnino cessantibus, integre satisfacere non omittat; alioquin extunc in dictum Episcopum excommunicationis ferens sentenciam, illam singulis diebus dominicis et festivis, pulsatis campanis et candelis accensis, in locis, de quibus expedire videris, facias sollempniter publicari; in illos, qui ad mandatum tuum sententiam ipsam taliter publicare contempserint, appellatione remota, censuram ecclesiasticam exercendo. Non obstante constitutione predicta seu aliqua indulgentia Sedis Apostolice dicto Episcopo concessa, per quam effectus presentium posset quomodolibet impediri, seu si eidem Episcopo uel quibuscunque aliis a Sede sit indultum etc. Datum Viterbii II. kalendas Martii, Pontificatus nostri anno tertio.

(Theiner, Vetera Monumenta Slavorum Meridionalium historiam illustrantia I. köt. 90. l.)