Stephanus Dei gracia junior Rex Hungarie, Dux Transsylvanus, Dominus Cumanorum, omnibus Christi fidelibus presentes litteras inspecturis, salutem in Domino sempiternam. Fidelitates et merita subditorum ad ampliandam Regalem graciam in subditis, Celsitudinem Regiam non immerito attrabunt et invitant, ut hoc exemplo fideles ad acquirende gracie cupiditatem multo forcius accendantur. Proinde universorum noticie harum serie declaramus, quod nos attendentes fidelitates, et seruiciorum merita dilecti et fidelis nostri Comitis Andree de Gyog, que nobis in pluribus articulis, et effundendo suum sanguinem contra Tartaros, commorando in confiniis, fideliter exhibuit et devote. In recompensacionem seruiciorum ejusdem volentes grata vicissitudine occurrere, quasdam terras, Germand videlicet, Polcholka et Cupud vocatas, sitas iuxta Morisium, terras videlicet Castri nostri Albensis Transsylvani, ab omni jurisdiccione ejusdem Castri exceptas penitus et exemptas, cum omnibus utilitatibus, et pertinenciis suis, et sub eisdem metis, et terminis, sicut per primos possesseres limitate fuerant et possesse, dicto Andree Comiti, et per eum suis heredibus, heredumque successoribus contulimus, dedimus, seu tradidimus, de plenitudine nostre gracie, perpetualiter et irrevocabiliter possidendas. Ut igitur hec nostra collacio seu donacio robur obtineat perpetue firmitatis, nec processu temporum per quempiam in irritum debeat vel possit retractari, presentes eidem concessimus litteras duplicis sigilli nostri munimine roboratas. Datum per manus Magistri Benedicti Prepositi Orodiensis, aule nostre Vice-Cancellarij, dilecti et fidelis nostri, anno Domini millesimo ducentesimo sexagesimo quarto.

(Néhai Rajcsányi Ádám kézirati gyűjteményéből.)