Bela Dei gracia Hungarie, Dalmacie, Croacie, Rame, Seruie, Gallicie, Lodomerie, Cumanieque Rex omnibus tam presentibus quam futuris presentes litteras inspecturis salutem in omnium saluatore. (V)t donaciones Regum perpetua firmitate solidentur, litterarum solent testimonio communiri. (P)roinde ad vniuersorum noticiam tenore presencium volumus peruenire, quod nos seruicia Comitis Zochud, que nobis in feruore fidelitatis semper honeste et laudabiliter curauit exhibere, que quidem, si per singula vellemus enarrare, honerosum foret audienti, Regia benignitate pensantes, eidem, vt ex hoc alij ad fidelitatis opera cicius incitentur, et per ipsum fratribus suis carnalibus, Serefel videlicet, Ders et Ladizlao, terras Castri nostri Nitriensis Zahurch et Cheteruch nuncupatas, vltra fluuium Wag existentes, a dicto Castro nostro eximendo de plenitudine gracie nostre duximus conferendas, in sua, heredum et successorum suorum potestate perpetuo duraturas. Ipsos itaque in corporalem possessionem terrarum predictarum per fidelem nostrum Michaelem Comitem de Scepus auctoritate Regia fecimus introduci; quarum eciam mete seu termini, prout in litteris fidelium nostrorum Nitriensis Capituli vidimus contineri, hoc ordine distinguntur: Incipit enim prima meta terre Cheturuch a quodam monte de terra ville Kuerencher, et uadit ad partem meridionalem descendens in quendam fluuium Kochyn vocatum, ubi sunt due mete; et transiens fluuium vadit iuxta eundem ad partem meridionalem, cum binis metis distinctis venitur ad quandam uiam, ubi sunt due mete; et per eandem protenditur ad partem orientalem, et iungitur ad terram ville Rakoych, de qua protenditur per quandam viam herbosam, et vadit usque ad fluuium Chetruz uocatum, et ibi sunt due mete, que separant a terra ville Borey; et transiens eundem fluuium uadit iuxta 23illum per binas metas, et venitur usque ad terram ville Banan; deinde procedit ad partem occidentalem, et cum binis metis descendit ad fluuium Chetruch superius nominatum, ubi eciam sunt due mete; et transiens fluuium uadit in montem, ubi sub quadam fago sunt due mete; deinde descendit in quandam viam, in qua uadit per binas metas ad fluuium Zahourch uocatum; et ibi taliter mete eiusdem terminantur. „Item incipit prima meta terre Zahorch a terra uille Olesca, et uadit continue ad partem septemtrionalem in fluuio Olesca uocato; et uenitur usque ad villam Brizona, ubi sunt due mete; deinde diuertit ad partem occidentalem, et uenitur ad fluuium Nadostov uocatum; exinde transit uersus partem meridionalem, et in quodam monte Clynoa uocato sunt due mete; a quibus descendit in quandam viam, et cum duabus metis uadit usque ad Klenek villam Magistri Aba, et ibi sub arbore sorbelli sunt due mete, de quibus descendit per binas metas usque ad terram ville Kerencher, et tendens in montem, qui uulgo dicitur berch, in eodem sunt due mete, et sic terminantur.” Vt igitur huius nostre collacionis series de terris supradictis, que presentibus omnibus commetancis et uicinis, ac iobagionibus Castri iam dictis fidelibus nostris sine contradiccione aliqua per iam dictum Comitem Michaelem de nostro mandato extiterunt assignate; prout in litteris dicti Capituli uidimus plenius contineri, robur perpetue firmitatis optineat, presentes dedimus litteras dupplicis sigilli nostri munimine roboratas. Datum per manus dilecti et fidelis nostri Magistri Farcasij Electi Albensis aule nostre Vice-Cancellarij, anno Domini M°CC° sexagesimo secundo, Regni autem nostri anno vicesimo octauo.

(Eredetie bőrhártyán, melyről a pecsét töredéke vörös-zöld selyemzsinóron függ, a budai kir. kamarai levéltárban.)