Stephanus Dei gracia Rex, primogenitus Illustris Regis Hungarie, Dux Transsiluanus, omnibus presens scriptum cernentibus salutem in eo, qui Regibus dat salutem. Circumspeccio Regum prouida condignis premiis se obsequentibus sic debet occurrere, ut alii eorum exemplo prouocati ad fidelitatis et seruiciorum studia forcius accendantur. Hinc est igitur, ut ad universorum presencium posterorumque noticiam harum serie volumus peruenire, quod nos attendentes fidelitatem Echy Comitis et seruicia ipsius, que nobis pro suo posse diligenter impendit, exhibendo nobis et nostris delicias gratanter et deuote; ad supplicacionem ejusdem, ut idem ad obsequendum nobis abilior promciorque habeatur, quandam terram in Districtu predii nostri de Souar existentem, ubi ecclesia ad honorem Beatissimi Ladizlai Regis est constructa, super qua quidam auceps Myco nomine de permissione karissimi patris nostri B. Illustris Regis Hungarie antea residebat, ipsi Echy Comiti, et per eum suis heredibus, heredumque successoribus de Regis liberalitate contulimus perpetuo possidendam. In cujus terre corporalem possessionem eundem per fidelem nostrum Tecus Comitem de Sarus fecimus introduci. Cujus terre mete, prout ab eodem Tecus Comite percepimus, hoc ordine distinguntur: prima meta incipit in fluuio Taarcha 12ab oriente in ponte, et ibi exit ad Scylospotok, ibique eundo superius peruenit ad puteum Burcut; deinde in eadem valle per sinistrum eundo ascendit ad berch, ubi sunt tres arbores de bikfa cruce signate a parte meridionali; inde descendit in vallem Ereuspotoc; deinde vadit superius ad viam, que ducit ad villam Radath, et eundo in illa via exit ad aliam viam, que ducit ad duas metas antiquas ad partem aquilonis; abhinc reflectit se juxta siluam in berch, venit ad orientem usque ad caput Toplo, et per riuulum Toplo descendens per magnam vallem cadit in fluuium Taarcha, et per eandem aquam descendens peruenit ad locum, ubi est pons subtus molendinum Michaelis, et ibi exit ad partem orientalem ad unam viam, que vadit paululum per fenetum, et ibidem intrat malacam, per quam itur ad fluuium Scukcha, et fluuius ille iterum cadit in Taarcha; et per Taarcham descendit inferius usque ad predictum pontem, ubi prima meta fuit incepta, ibique terminatur. Ac ut hujusmodi nostra donacio robur obtineat perpetue firmitatis, presentes nostras literas eidem contulimus sigilli nostri munimine roboratas. Datum per manus Magistri Benedicti Prepositi Scybiniensis aule nostre Vice-Cancellarij anno Domini M°CC° sexagesimo primo.

(Eredetie Eperjes város levéltárában.)