B. Diuina miseracione Abbas Monasterij Sancti Egidij de Simigio et Conuentus eiusdem loci, vniuersis Christi fidelibus tam presentibus quam futuris, presens scriptum inspecturis, salutem in eo, qui est salus omnium. Ad noticiam vniuersorum uolumus peruenire; quod Heym, Paulus et Dionysius filij Heym Comitis coram nobis constituti uiva uoce asseruerunt, quod triginta iugera terrarum cum uno feneto et duabus uineis in villa Rad existentibus, pro remedio anime patris eorum, et insuper pro tribus marcis argenti Monasterio Sancti Martini de Sacro Monte Pannonie contulissent perpetuo possidendas. Preterea dictus Heym cum fratribus suis prenominatis obligauit se, quod si aliquo tempore predicta triginta iugera terrarum et fenetum seu vinee ab aliquo inpeterentur, sepedicti filii Heym Comitis propriis sumptibus et laboribus suis liberare et expedire tenerentur. Vt autem huius rei series firma et stabilis permaneat, ad instanciam et peticionem supradictorum filiorum Heym Comitis litteras nostras sigillorum nostrorum munimine concessimus roboratas. Datum anno gracie M. CC. LV.

(Eredetie a pannonhalmi főapátság leváltárában.)