234. A jadrai kereskedőknek kereskedelmi viszonyai Velenczében szabályoztatnak. 1251.

In nomine Dei Aeterni Amen. Anno ab Incarnatione Domini nostri Jesu Christi millesimo ducentesimo quinquagesimo pimo die octauo exeunte mense Augusti, Indictione IV. Rivoalti urbe felici in Palatio Ducatus Venetiarum; presentibus testibus rogatis Nobilibus viris Lampre filio quondam Preste de Daria, Juano filio Petrici de Forte, Dimitrio filio Preste de Matafaro, Matthaeo filio quondam Theodori Tosaningi, Andrea filio Bendae Jadratinis Joanne Barocio Bartholomaeo de Mugla, Henrico de Fuscareno, Dominico Arimundo de Venetiis, et aliis multis. Coram domino Marino Mauroceno Dei gratia Inclito Duce Venetiarum, Nos Stephanus de Piciga, et Zerne de Mergia, Nuncii et Ambaxatores Comitis, Consiliariorum et Communis Jadrae, habentes plenam commissionem ab eisdem, tenor cujus commissionis inferius continetur, concedentes concedimus et determinamus nomine et vice praedictorum Comitis et Consiliariorum et Communis Jadrae, ut amodo Jadretini de mercibus, quas detulerint Venetias de Regno Siciliae sive Apuliae, et de aliis partibus undecunque, illud datium Communi Venetiarum in Venetiis dare et soluere debeant et teneantur, quod constitutum est, vel de cetero fuerit constitutum per dominum Ducem et Commune Venetiarum dandi et solvendi ab hominibus Venetiarum in Venetiis Communi Venetiarum pro datio dictorum mercimoniorum, quas Veneti Venetias apportarent; ita quod Jadretini in dictis dationibus aequales esse debeant Venetorum. Tenor autem commissionis, cujus est habita superius mentio, talis est:

In nomine Dei Aeterni Amen. Anno ab Incarnatione Domini Nostri Jesu Christi millesimo ducentesimo quinquagesimo primo, mense Julii die quarto intrante, Indictione IX. Jadrae. Committentes committimus nos quidem Bauduinus Quirinus Dei gratia Comes Jadrae, et Joannes Delphinus, ac Raphael Betani, ambo Consiliarii, atque cum nostris Judicibus Preste Matafari, Papo Pretognae, et Cosa Saladini, una cum nostro Consilio universo ad sonum campanae in Ecclesia Sancti Petri novi more solito congregato, per nos et universum nostrum Commune Jadretino, vobis namque nobilibus viris Stephano de Piciga, et Cerne de Mergio dilectis nostris fidelibus et nunciis specialibus, quod ire pro nobis et nostro nomine debeatis ad pedes Illustrissimi ac Magnifici domini nostri Marini Mauroceno Dei gratia Venetiarum etc. Ducis etc. ad petendum gratiam et misericordiam ab eodem de omnibus, quae vobis videbitur conveniem atque decens, et in augendo sive minuendo ac corrigendo pactum inter Venetias et Jadram confectum, promittentes firmum et ratum habere, quidquid in omnibus et per omnia super his duxeritis faciendum. Actum est hoc in Majori Consilio, et firmatum omnibus praesentibus in praedicta Ecclesia Sancti Petri novi de Jadra.

Ego Balduinus Quirino Comes Jadrae manu mea scripsi. - Ego Joannes Delphyno Consiliator Jadrae m. m. ss. - Ego Raphael Betani Consiliator m. m. ss. - Signum suprascriptorum Preste et Cosae Judicum, qui hoc rogaverunt fieri. - Ego Papo de Petrona Judex m. m. ss. - Ego Bartholomaeus de Dumin m. m. ss. - Ego Petrus Scandolarius Presbyter Sancti Appollinaris Jadrae Notarius, his praedictis interfui rogatus, ut audivi hanc cartam scripsi, roboravi et signo consveto signavi.

(Hic cadit locus signi Notarii)

Ego Grabriel Paulinus et Ducalis Aulae Venetiarum Cancellarius praedictis interfui et rogatus scripsi, complevi et roboravi.

(A velenczei Liber Pactorum czímű államkönyvből II. köt. 75. l.)