Bela Dei gracia Hungarie, Dalmacie, Croacie, Rame, Seruie, Gallicie, Lodomerie, Cumanieque Rex omnibus presentem paginam inspecturis salutem in omnium saluatore. Lex est Regia et a naturali equitate descendens, pro meritis subiectorum largicionum suarum respondere premijs equa lance. Hinc est, quod ad uniuersorum tam presencium quam futurorum noticiam tenore presencium uolumus peruenire, quod Comes Nicolaus filius Theodori et Magister Duruzlaus filius Duruzlai, nobiles de Comitatu Castri Ferrei ad nostram accedentes presenciam, Celsitudini nostre cum precum instancia postularunt, ut quandam terram ipsius Castri nostri Rwm noncupatam eis conferre benignitate Regia dignaremur. Nos itaque attendentes eorundem Comitis Nicolai et Magistri Duruzlai multimoda meritorum graciosa obsequia, quibus nobis interim in prosperis uidelicet casibus et aduersis adeo strenue claruerant, se promptos exhibendo et deuotos, ut tam a nobis, quam eciam ab omnibus nobilibus Regni nostri et alijs digne laudarentur, et maxime quia in expedicione nostra, quam contra Regem Boemorum habebamus, ipse Comes Nicolaus sic uiriliter et fideliter suum impendit famulatum, vt nedum eis per nos concessa et tradita, verum eciam alia a munificencia Regia merito et patenter assequi potuissent, peticionem eorundem huiusmodi fauorabiliter de benignitate Regalis sublimitatis admittentes, iam dictam terram Rwm cum omnibus pertinencijs, siluis, nec non attinencijs et utilitatibus vniuersis, ac pratis seu fenetis, et specialiter cum loco molendini in metis et terminis terre eiusdem existenti, ipsis Comiti Nicolao filio Theodori et Magistro Duruzlou, et per eos suis heredibus, heredumque suorum successoribus dedimus, donauimus et contulimus iure perpetuo possidendam pariter et habendam, in eisdem antiquis metis et terminis, seu eciam distinccionibus terminorum, quibus per priores possessores limitata extitit seu possessa. Vt igitur huius nostre donacionis series robur obtineat perpetue firmitatis, nec processu temporum possit in irritum reuocari, presentes concessimus litteras duplicis sigilli nostri munimine roboratas. Datum per manus discreti uiri Magistri Pauli Prepositi Albensis aule nostre Vice-Cancellarij dilecti et fidelis nostri. Anno Domini Mş CCş quinquagesimo, XIIş. kalendas Decembris, Regni autem nostri vicesimo quinto.

(Eredetie a Rumy család levéltárában; másolata a Magyar Akadémia kézirati gyűjteményében.)