Paulus Judex Aule Regie et Comes Zaladiensis vniuersis presens scriptum intuentibus salutem in eo, qui est salus omnium. Ad universorum volumus peruenire noticiam, quod constitutis coram nobis partibus, videlicet Abbate et jobagionibus Monasterii de Beel ex una parte; et jobagionibus Castri Korkon ex altera, intelleximus partium consensu, terram dicti Monasterij, que communiter sita fuerat terre populorum de villa Scelch, aratris duobus subjectam, trecenta et quadraginta jugera in se continentem, juxta tenorem privilegij Illustris tunc Regis Bele felicis memorie, a terra prefate ville Scelch debere segregari. Nos itaque congruis parcium acquiescentes voluntatibus, mediante homine nostro Michaele de Gely terram ad duo aratra a terra sepedicte ville facientes separari propter cautellam altercacionis juxta priorem numerum jugerum a plaga septemtrionali sitam, tribus villis Castri Soproniensis, videlicet Keycuch, Geztey et Surch per crebras binas metas, vsque quo venitur ad Grenche, in possessionem dicti Monasterij fecimus assignari perpetuo possidendam. Ne igitur super facto dicte terre temporis processu nouacio vel lis aliqua oriatur pro distincte terre statu, ad parcium peticionem dedimus presentes litteras sigilli nostri munimine roboratas. Anno Dominice Incarnacionis Mş CCş quadragesimo nono.

(Eredetie bőrhártyán a pannonhalmi főapátság levéltárában.)